Седлоски поднесе оставка од тренерското место во Вардар


Кој ќе тепа на Ел Класико!? ↓↓↓


Шефот на стручниот штаб на македонскиот шампион, Вардар, денес преку соопштение се обрати до јавноста.

Во соопштението Седлоски наведува дека донел одлука да го напушти тренерското место во клубот. Тој истакнува дека ова го планирал уште по вториот натпревар со Копенхаген, но собрал сили за дуелот со Шкендија. Сепак по катастрофата на клубот во Тетово, Седлоски се решил да го повлече потегот и да престане со извршување на функцијата шеф на стручниот штаб на Вардар.

„Почитувани.

Јас, Гоце Седлоски денес донесов одлука да си поднесам оставка од местото шеф на стручен штаб на ФК Вардар, за доброто на сите во клубот. Ова размислував да го направам уште после вториот натпревар со ФК Копенхаген кој што го загубивме. Сепак, успеав да соберам сили и да го започнам македонското првенство. После загубениот натпревар со Шкендија, овие два дена размислував добро и денеска ја донесов оваа одлука. Тие два порази ме погодија многу бидејќи јас како човек не сум навикнат да губам, но и фудбалскиот клуб Вардар не е навикнат на порази.

Горд сум на постигнатото. Успеавме да освоиме две титули во две години, а горд сум и на победата над Малме и пласманот во третото квалификациско коло од Лигата на шампионите, како и домашната победа со Копенхаген.

Сакам да се заблагодарам на играчите, управата и до сопственикот г-нот Сергеј Самсоненко од кој имав несебична поддршка во целиот период. Благодарност и до сите вработени во Фудбалскиот клуб Вардар. Жалам, дојде време да се разделиме. На фудбалскиот клуб Вардар му посакувам успех на европска сцена во плеј-офот од Лигата на Европа против Фенербахче, како и во домашното првенство и Купот на Македонија“.