Капитенот на Швајцарија и Сандерленд, Гранит Џака, доби условна парична казна од 150.000 швајцарски франци затоа што во 2022 година прибавил фалсификуван сертификат за вакцинација против ковид-19. Казната е условна со рок од две години и нема да мора да ја плати доколку во тој период не направи нов прекршок.
Џака самиот ја објави одлуката на Инстаграм. „Пред неколку недели лично кажав дека ќе преземам одговорност за својата одлука. Стојам зад тоа. Со скратена постапка бев осуден за прибавување лажен сертификат на условна парична казна од 50 дневни износи од по 3.000 франци“, напиша 34-годишниот фудбалер, пренесува BBC Sport.
„Ја прифаќам одлуката и преземам одговорност за своите постапки. Ви благодарам за многуте пораки на поддршка во изминатите недели. Ми значат многу“, додаде Џака, кој соопшти дека веќе ги платил судските трошоци.
Го пропушти и дуелот со Македонија
Џака во 2022 година играше за Арсенал, а на 21 септември објави изјава во која призна дека имал недоверба кон вакцината и дека бил под влијание на загриженост и несигурност. По таа изјава се повлече од кампот на Швајцарија за натпреварите од Лигата на нациите против Шкотска, Македонија и Словенија во репрезентативната пауза што штотуку заврши.
Швајцарската канцеларија за јавно здравје појасни дека никогаш немало општа законска обврска за поседување ваков сертификат, но тој бил потребен за пристап до различни активности, објекти и за патувања. Мерките во Швајцарија важеа до пролетта 2022 година, а потоа сертификатите се издаваа главно за влез во други земји.
Враќање против Брајтон
Џака е рекордер по бројот на настапи за Швајцарија со 152 натпревари. Тој беше капитен на репрезентацијата на Светското првенство оваа година, на кое Швајцарија беше елиминирана во четвртфиналето од Аргентина, подоцнежниот финалист.
Се очекува да се врати на терен во сабота, кога Сандерленд го пречекува Брајтон од 16 часот по македонско време. „Без коментар за надворешните теми, но од она што го видов во репрезентативната пауза, тој тренираше многу добро. Тоа е позитивно. Фудбалски е во добра форма и тоа за мене е најважно“, изјави тренерот на Сандерленд, Режис ле Бри.
