Најкорисниот играч во НБА лигата во последните две сезони, Шеј Гилџес-Александер, стана дел од сопственичката група на Атлетико Мадрид. Шпанскиот клуб во четвртокот официјално објави дека бекот на Оклахома Сити Тандер станал негов акционер.
Атлетико не ја откри големината на уделот ниту вредноста на инвестицијата. Според клубот, партнерството се темели на заеднички вредности: амбиција, извонредност и верување дека секој резултат мора да се заслужи. Мнозински сопственик на мадридскиот клуб од минатата година е американскиот фонд Аполо, пренесува ESPN.
„Возбуден сум што официјално се приклучувам кон сопственичката група на Атлетико Мадрид. Ова е клуб со долгогодишно присуство на врвот на европскиот фудбал и благодарен сум за можноста да бидам дел од неговата иднина“, изјави Гилџес-Александер.
Рекордна сезона и шампионски прстен
Канаѓанецот е роден во Торонто во 1998 година, а израснал во Хамилтон, Онтарио. По една сезона на Универзитетот Кентаки стигна во НБА, каде што помина една сезона во Клиперс, а во 2019 година премина во Оклахома. Тој е двократен МВП на лигата, шампион и МВП на финалето во 2025 година, наведува Atlético de Madrid.
Во сезоната 2025/26 бележеше просечно 31,1 поен по натпревар, со 55,3 отсто успешност на шутот од игра, и стана првиот бек во историјата на НБА со просек од најмалку 30 поени и успешност на шутот од 55 отсто или повеќе. Го собори и рекордот на Вилт Чемберлен од 126 последователни натпревари во регуларниот дел со најмалку 20 поени, а серијата ја продолжи на 140 натпревари до крајот на сезоната.
Гилџес-Александер настапи за Канада и на Олимписките игри во 2024 година, а претходно оваа година беше фотографиран во тренерка на Атлетико.
Уште една кошаркарска ѕвезда во фудбалот
Атлетико е еден од најуспешните шпански клубови и моментно се наоѓа на второто место на табелата во Ла Лига. Последните шампионски титули ги освои во 2014 и 2021 година под водство на Диего Симеоне, кој и денес е тренер на тимот. Со оваа инвестиција, Гилџес-Александер им се придружува на другите НБА ѕвезди кои вложиле во фудбалот, како Леброн Џејмс и Кевин Дурант.
