Егзибицискиот тениски турнир „Шест кралеви“ во Саудиска Арабија нема да се одржи во октомври. Организаторите го презакажаа натпреварувањето од 21-24 октомври за 27-30 декември, по серијата смртоносни напади врз Ријад, пренесува BBC Sport.
„Одлуката ја одразува заложбата на Сезоната во Ријад да организира спортски настани според највисоките стандарди, по проценката на организациските и логистичките предизвици поврзани со домаќинството на турнирот и нивното можно влијание врз доживувањето на публиката“, се вели во соопштението на организаторите.
Одложувањето следува по нападите што јеменското движење Хути ги започна врз Саудиска Арабија во текот на викендот. Според BBC, во ракетниот напад врз аеродромот во Ријад во саботата загинаа 13 лица, а повеќе од 300 беа повредени. Салата во која се одржува турнирот се наоѓа на околу 31 километар од меѓународниот аеродром „Крал Халид“.
На турнирот требаше да настапат Карлос Алкараз, Новак Ѓоковиќ, Александар Зверев, Тејлор Фриц, Алекс де Минор и Лернер Тиен. Јаник Синер, кој ги освои првите две изданија и двапати го победи Алкараз во финалето, оваа година не можеше да настапи поради повреда на коленото.
„Шест кралеви“ е еден од најпрофитабилните турнири во тенисот. Според Sky Sports, секој учесник добива 1,2 милиони фунти само за настап, а победникот добива дополнителни 3,5 милиони фунти.
Новиот термин во последните денови од декември може да донесе нови проблеми за учесниците. Тоа е период кога тенисерите се подготвуваат за новата сезона и за патувањето во Австралија, па останува да се види дали сите шестмина ќе останат на списокот.
Нападите се одразија и на другите спортови во земјата. Саудиската Про лига одложи три натпревари, а гостувањето на Ал Наср кај Ал Ахли во Џеда е презакажано за март. Азиската голф турнеја соопшти дека внимателно ја следи ситуацијата пред турнирот во Ријад, закажан за 18-21 ноември.
Јапонската фудбалска федерација, пак, одлучи да не учествува на ФИФА еСветското првенство во Џеда од 16 до 25 октомври, по проценка на безбедносната ситуација, а Фудбалската федерација на Австралија исто така соопшти дека ја следи состојбата, наведува Sky Sports.
