Новак Ѓоковиќ ќе настапи на турнирот од категоријата АТП 500 во Базел. Српскиот тенисер прифати вајлд-карта за главниот жреб на „Свис Индорс“, кој почнува на 26 октомври, и таму ќе се бори за својата 103та титула во кариерата.
АТП го најави неговото враќање со кратката порака „17 години подоцна…“, алудирајќи на 2009 година, кога Ѓоковиќ го освои трофејот во Базел. Тоа е и неговата единствена титула на овој турнир.
Освојувачот на 24 гренд слем трофеи последен пат настапи во Базел во 2011 година, кога во полуфиналето беше елиминиран од Јапонецот Кеи Нишикори. Во 2010 година стигна до финалето, во кое загуби од домашниот миленик Роџер Федерер. Ова ќе му биде четврти настап на турнирот, а во салата „Санкт Јакобсхале“ има биланс од 12 победи и два пораза.
Одлуката е донесена во последен момент. Според Blue News, менаџерот на Ѓоковиќ побарал вајлд-карта од организаторите, а директорот на турнирот, Роџер Бренвалд, изјавил за „Базлер цајтунг“ дека на играч од неговиот калибар едноставно мора да му се даде таква можност.
Со тоа Ѓоковиќ ја промени одлуката што ја соопшти на прес-конференцијата во Шангај и го забрза враќањето на теренот, кое првично беше планирано за мастерсот во Париз. Во меѓувреме, егзибицискиот турнир „Шест кралеви“ во Саудиска Арабија беше одложен за крајот на декември.
Главниот мотив е пласманот на завршниот турнир во Торино. Ѓоковиќ во моментов е 11ти на ранг-листата за АТП финалето со 2.840 бода и заостанува 69 бода зад Рафаел Јодар, кој го држи последното место што води во Торино, откако Јаник Синер предвреме ја заврши сезоната, пишува Tennis Now.
Триесет и деветгодишниот Србин неодамна го освои турнирот во Пекинг. Со таа титула стана првиот тенисер во историјата што освоил АТП трофеј во 21 последователна сезона, а воедно и најстариот освојувач на АТП титула по Кен Розвол во 1977 година.
Ако триумфира во Базел, Ѓоковиќ ќе се израмни со Федерер со 103 титули на АТП турнејата, и тоа токму во родниот град на Швајцарецот. Рекордер во отворената ера е Американецот Џими Конорс со 109 трофеи.
Конкуренцијата во Базел ќе биде силна. Меѓу пријавените се Бен Шелтон и Тејлор Фриц, а таму својата кариера ќе ја заврши и Стан Вавринка.
