Напаѓачот на Реал Мадрид, Килијан Мбапе, е добитник на наградата „Златен Онз“ (Onze d’Or) за најдобар фудбалер во сезоната 2025/26. Признанието, кое го доделува француското списание Онз Мондијал според гласовите на читателите, Мбапе го доби првпат во кариерата, точно една недела пред церемонијата за доделување на Златната топка.
Според Онз Мондијал, на веб-страницата на списанието биле регистрирани повеќе од два милиони гласови, а францускиот репрезентативец освоил убедливи 48,2 отсто. Втор е играчот од средниот ред на ПСЖ, Жоао Невеш, со 11,9 отсто, а трет е неговиот соиграч Хвича Кварацхелија со 10,8 отсто.
Зад нив се Ламине Јамал со 9,7 отсто и минатогодишниот добитник Усман Дембеле со 7,5 отсто. Следуваат Хари Кејн (4,4), Мајкл Олисе (2,9), Витиња (2,8), Деклан Рајс (1,1) и Бруно Фернандеш (0,7), додека Вилијам Салиба, добитник на наградата во 2023 година, не добил ниту еден глас.
Мбапе ја заслужи наградата со сезона во која беше најдобар стрелец и во Ла Лига и во Лигата на шампионите. Во шпанското првенство постигна 25 гола, а во најелитното европско натпреварување 15, иако со Реал не освои трофеј, наведува списанието.
Уште поголем впечаток остави на Светското првенство 2026, на кое постигна 10 гола и забележа четири асистенции. Со вкупно 22 гола на мундијалите стана најдобар стрелец во историјата на Светските првенства, пред Лионел Меси (21) и Мирослав Клозе (16).
„Сакам да им се заблагодарам на сите што гласаа за мене. Ова многу ми значи. Работата продолжува“, кратко изјави Мбапе за Онз Мондијал, пренесува Football.fr. Наградата ја потврди и Реал Мадрид на својата официјална веб-страница.
Наградата „Златен Онз“ годинава слави 50 години, а во минатото ја добивале легенди како Диего Марадона, Зинедин Зидан, Кристијано Роналдо и Лионел Меси. Во гласањето за најдобар тренер во сезоната, читателите на списанието повторно му ја доделија наградата на Луис Енрике од ПСЖ. Мбапе, пак, се приклучи и на списокот на француски добитници, на кој се Мишел Платини, Жан-Пјер Папен, Ерик Кантона, Зидан, Тиери Анри, Антоан Гризман, Карим Бензема и Дембеле.
Сега погледите се свртени кон 26 октомври, кога во Лондон ќе биде доделена Златната топка. Дембеле минатата година ги освои и „Златниот Онз“ и Златната топка, а Мбапе е меѓу главните фаворити во трката за најпрестижното индивидуално признание.
