Поранешната НБА ѕвезда Двајт Хауард ја заврши професионалната кошаркарска кариера. Грузискиот клуб Блек Фортрес од Тбилиси, за кој 40-годишниот центар настапи на само два натпревари, објави дека Хауард го одиграл последниот натпревар во кариерата.
Збогувањето се случи во саботата, кога Блек Фортрес во грузиската Суперлига загуби со 82-89 од ТСУ, тимот на Државниот универзитет во Тбилиси. Хауард на последниот натпревар постигна десет поени и забележа четири скока, пренесува BasketNews.
Неговиот престој во Грузија беше краток. Хауард дебитираше на 10 октомври против Ивериони од Гори, кога за 17 минути постигна 12 поени, погодувајќи пет од осум шута од игра, забележа седум скока и три блокади, но Блек Фортрес загуби со 70-75. По поразот од ТСУ, тимот остана без победа на стартот од сезоната, со учинок 0-3, наведува Eurohoops.
И покрај скромниот амбиент, навивачите во Тбилиси му приредија топло испраќање, со скандирања и аплаузи. Клубот претходно го најавуваше натпреварот како посебна прослава по повод збогувањето на една од најголемите ѕвезди што некогаш заиграле во грузиската лига.
Хауард беше избран како прв пик на драфтот во 2004 година и осум години беше предводник на Орландо Меџик, со кој во 2009 година стигна до финалето на НБА. Шампионскиот прстен го освои во 2020 година со Лос Анџелес Лејкерс, за кои го одигра и последниот натпревар во НБА во 2022 година.
Во 18 сезони во најсилната лига на светот, Хауард осум пати учествуваше на Ол-стар натпреварот и трипати по ред беше прогласен за најдобар одбранбен играч. Пет пати беше најдобар скокач во лигата, а двапати најдобар блокер. Во кариерата во НБА одигра 1.242 натпревари, со просек од 15,7 поени, 11,8 скока и 1,8 блокади. Со репрезентацијата на САД го освои златото на Олимписките игри во Пекинг во 2008 година и бронзата на Светското првенство во 2006 година.
По заминувањето од НБА, Хауард продолжи да игра низ светот. Најдолго се задржа во Тајван, каде што настапуваше за Таојуан Леопардс, а играше и на Филипините и во Монголија, на турнир во Дубаи, како и во американската лига Биг3, пред последната станица во Грузија.
Во 2025 година Хауард беше примен во Куќата на славните на кошарката „Нејсмит“, заедно со Кармело Ентони, како еден од најдоминантните центри на својата генерација.
