Македонската репрезентација во традиционално карате ќе настапи на Светското првенство, кое од четврток до недела, од 22 до 25 октомври, ќе се одржи во словенечкиот град Копер. Македонија ќе ја претставуваат 14 натпреварувачи во различни возрасни категории, а најголем дел од екипата се деца и кадети.
Според Меѓународната карате унија, натпреварувањето ќе се одржи во спортската сала „Бонифика арена“ во Копер. За четврток е закажан семинар за тренерите, а програмата завршува во недела со Светските игри во рамките на шампионатот. Пријавувањето на натпреварувачите беше затворено на крајот на септември.
Кај сениорите Македонија ќе ја претставува Матеј Јарчевски. Во кадетската конкуренција ќе настапат Камелија Недев и Софија Јарчевска, а во категоријата деца од 11 до 13 години ќе настапат Филип Недев, Георги Кокорманов, Драган Стојановски и Миле Спанџев.
Најбројна е групата на најмладите, деца од осум до десет години. За Македонија во оваа категорија ќе се борат Тадеј Недев, Максим Поп Трпев, Коста Стојановски, Михаил Стојановски, Лина Ранова и Предраг Брезовски.
На шампионатот во Копер се очекуваат околу 1.500 натпреварувачи од 58 земји од целиот свет. Настапот на македонските каратисти, како што наведуваат од репрезентацијата, е можност за афирмација на традиционалното карате и македонскиот спорт на меѓународната сцена.
Македонските каратисти во Копер ќе се обидат да го повторат успехот од последното Светско првенство, одржано во 2024 година во Буенос Аирес, кога Дејан Недев го освои бронзениот медал во ката кај сениорите.
Светското првенство во Словенија доаѓа само неколку дена по големиот успех на македонското карате во друга федерација. Марко Џорлев од Штип минатата недела во Полска стана светски првак во младинската конкуренција, додека Реџеп Рушити на истото првенство заврши на петтото место, откако бронзениот медал му избега во последните секунди од борбата.
