Уругвајскиот фудбалер на Бетис, Факундо Бернал, ќе паузира четири натпревари поради инцидентот со Ламин Јамал во дербито против Барселона на „Ла Картуха“. Дисциплинската комисија на Шпанската фудбалска федерација (РФЕФ) во средата ги отфрли жалбите на клубот од Севиља и му ја изрече минималната казна предвидена за физички напад, пренесува Марка.
Судијата Рикардо де Бургос Бенгоечеа во записникот наведе дека Бернал, „во текот на една пресметка, го фати противникот за врат и му зададе два последователни удари со глава во лицето, додека топката не беше во игра“. Јамал не побара медицинска помош и го продолжи натпреварот. Инцидентот се случи во 54тата минута, веднаш откако Бетис го намали резултатот на 3-2, а Барселона на крајот славеше со 5-2.
Бетис поднесе жалба, тврдејќи дека записникот содржи очигледна грешка бидејќи не ја отсликува претходната пресметка ниту улогата на противничкиот играч, кој доби само жолт картон. Клубот достави и видеоснимки, но комисијата оцени дека на нив „јасно се гледа дека казнетиот играч ја прави опишаната акција“.
„Таквото однесување претставува напад според членот 103.1 од Дисциплинскиот правилник, а не само насилно однесување според членот 130.2. Отсуството на повреда не ја менува оваа квалификација“, се наведува во одлуката, која ја пренесува Кадена СЕР. Бидејќи е изречена минималната казна, комисијата не ја разгледуваше провокацијата како олеснителна околност, на која се повикуваше Бетис.
Казните не завршија само со Бернал. Спортскиот директор на Бетис, Ману Фахардо, доби суспензија од два натпревари и парична казна поради однесување спротивно на спортскиот ред, а во одлуката е забележан и жолтиот картон што го доби тренерот Мануел Пелегрини поради забелешките кон судиите.
Бетис веќе најави жалба до Апелационата комисија, со надеж дека казната ќе биде намалена или поништена. Според Гол, Бернал ќе пропушти првенствени натпревари и еден куп-дуел, а во клубот сметаат дека казната е непропорционална на она што се случи на теренот.
Дваесет и двегодишниот Уругваец уште по натпреварот се извини на социјалните мрежи. „Не реагирам вака често и требаше да се контролирам во таа ситуација. Ја преземам одговорноста и тоа нема да се повтори“, порача Бернал, кој им се извини на соиграчите и на навивачите на Бетис.
