Лионел Скалони ќе продолжи да ја води репрезентацијата на Аргентина. Според аргентинските медиуми, селекторот кој ја донесе светската титула во Катар постигнал договор со Аргентинската фудбалска асоцијација (АФА) за продолжување на соработката, а официјалната објава се очекува во наредните денови.
Како што пишува Ла Насион, недостасува само потписот. Станува збор за договор од типот „2+2“, односно две години до Копа Америка 2028, со автоматско продолжување до Светското првенство 2030 доколку двете страни се согласат. „Прашањето со Скалони е договорено уште пред неколку недели“, изјавил извор близок до претседателот на АФА, Клаудио Тапија.
Според весникот, официјално соопштение немаше за време на последната пауза на ФИФА затоа што Скалони не сакал да го одвлече вниманието од Лионел Меси, кој тогаш се збогува со репрезентацијата и го одигра својот последен натпревар за Аргентина против Бенин на стадионот „Монументал“. АФА на 25 септември објави дека започнале разговорите меѓу Тапија и Скалони за продолжување на договорот.
48-годишниот селектор по финалето на Светското првенство 2026 побара време за да размисли за својата иднина. „Реков по финалето дека треба добро да се размисли. Беше негативен момент, морав добро да размислам, да го анализирам спортскиот дел, кој е суштински, а не го заборавам ни финансискиот. Возбудени сме за тоа, тоа е најважно. Во спротивно, искрено, ако не видев можност да бидеме конкурентни и да изградиме нешто убаво како што беше изградено, немаше ни да седнам да разговарам“, изјави Скалони на прес-конференцијата пред последните пријателски натпревари.
Скалони ја презеде Аргентина во 2018 година и оттогаш освои две титули на Копа Америка, Финалисима во 2022 година и Светското првенство во Катар, а оваа година ја одведе репрезентацијата и до финалето на Мундијалот. Според Буенос Аирес Тајмс, кој се повикува на агенцијата Нотисиас Архентинас и на Перфил, објавата може да следува и за време на следната репрезентативна пауза, кога селекторот ќе биде во Аргентина.
Отворено останува прашањето за помошникот Валтер Самуел, кој имал понуда да му се придружи на Кристијан Киву во Интер. Ако Самуел реши да замине, како можна замена се спомнува Диего Пласенте, кој минатата година ја предводеше младинската репрезентација до 20 години до второто место на Светското првенство во Чиле.
Аргентина ќе ја заврши годината со два пријателски натпревари во ноември, против Уругвај на „Бомбонера“ на 13 ноември и против Костарика во Кордоба на 17 ноември. Скалони нема да може да смета на Леандро Паредес и Науел Молина, кои издржуваат казни од ФИФА поради инцидентите по финалето на Светското првенство, а под знак прашалник е и Лаутаро Мартинес, кој се опоравува од мускулна повреда.
