Александар Волкановски во сабота го очекува еден од најтешките тестови во кариерата. Австралиецот со македонско потекло на УФЦ 333 во „Етихад Арена“ во Абу Даби ја брани шампионската титула во перо категорија против непоразениот Русин Мовсар Евлоев.
Тоа ќе биде втора одбрана на појасот за Волкановски оваа година. Двократниот шампион ја врати титулата во 2025 година, а на почетокот на оваа година во Сиднеј ја одбрани во реваншот со Диего Лопес, во борба што беше прогласена за најдобра на вечерта. Тоа беше негова осма успешна одбрана на титулата, а сега во Абу Даби, каде што се враќа по три години, може да постави нов рекорд по бројот на одбрани во перо категорија, пишува официјалната страница на УФЦ.
Евлоев долго чекаше шанса за титулата. Има 20 победи и ниту еден пораз во професионалната кариера, од кои десет победи во УФЦ, но досега во октагонот не забележал ниту една победа пред крајот на борбата. Неговото најсилно оружје е борењето, со кое досега ги неутрализирал сите противници во УФЦ.
Во последната борба против Лерон Марфи, 32-годишниот Русин првите две рунди ги помина во размена на удари, а во последните три рунди беше успешен во девет од десет обиди за рушење. Затоа почетокот на борбата со Волкановски би можел да открие многу за тоа во која насока ќе се одвива дуелот.
Двајцата борци во четвртокот се соочија на прес-конференцијата во Абу Даби, на која, според објавите на УФЦ, од публиката се слушаа и скандирања за Евлоев.
Во втората главна борба Петр Јан и Мераб Двалишвили по третпат ќе се борат за титулата во бантам категорија. Јан го врати шампионскиот појас минатата година на УФЦ 323, кога на Двалишвили му дозволи само две рушења од 29 обиди и ја прекина неговата серија од 14 победи. Русинот сега има четири последователни победи и скор од 20 победи и пет порази.
На главната картичка се и борбите меѓу Лонер Кавана и Рамазан Темиров во мува категорија, Александар Волков и Ризван Кунијев во тешка категорија, како и Арон Пико и Лосене Кеита.
Прелиминарните борби почнуваат во 16:00 часот по македонско време, а главната картичка во 20:00 часот.
