Вечерва од 21:00 часот на „Спотифај Камп Ноу“ ќе се игра првото Ел Класико во сезоната. Барселона го пречекува Реал Мадрид во 10тото коло од Ла Лига, а дуелот може значително да влијае на трката за титулата.
Барселона е на врвот на табелата со 27 бода од девет натпревари, односно со максимален учинок. Атлетико Мадрид има 25 бода по десет натпревари, откако во саботата го совлада Депортиво со 1-0 со голот на Хулијан Алварез. Реал Мадрид е трет со 21 бод.
Ако победи на вечерашната средба, Барселона ќе има предност од девет бода пред Реал Мадрид.
Тренерот на Барселона, Ханзи Флик, нема да може да смета на Жил Кунде. „Кунде нема да игра, не сакаме да ризикуваме со него“, изјави Флик на прес-конференцијата, според Гол. Каталонците ќе играат и без Дани Олмо, кој поради повреда ќе отсуствува околу еден месец.
Флик имаше пофални зборови за Жозе Мурињо, кого го опиша како одличен тренер кон кого има најголема почит. „Ова е најдобриот натпревар од сите. Тоа е многу повеќе од три бода“, рече тренерот на Барселона, според Еј-Ес-Пи-Ен.
Флик рече и дека Барселона мора да внимава на прекините, бидејќи Реал Мадрид е еден од најдобрите тимови во тој сегмент. „Мораме да се браниме подобро отколку во Париз“, додаде тој. Наместо Олмо, на располагање е Фермин Лопез.
Реал Мадрид има поголеми проблеми со составот. Винисиус Жуниор го пропушта вториот од четирите натпревари поради суспензија, а отсуствуваат и Родриго, Раул Асенсио и Ферлан Менди. Во неделата наутро Реал Мадрид соопшти дека поради грип отпаѓа и Тибо Куртоа, па на голот ќе стои Андриј Лунин.
Главен судија на натпреварот ќе биде Мартинез Мунуера, а за ВАР ќе биде задолжен Иглесијас Виљануева.
Минатата сезона Барселона го доби Класико на свој терен со 2-0 и со таа победа ја освои 29тата титула во својата историја.
