Хулијан Алварез во саботата со гол и извинување се обиде да го поправи нарушениот однос со навивачите на Атлетико Мадрид. Аргентинецот го постигна единствениот гол во победата од 1-0 над Депортиво Ла Коруња во 10тото коло од Ла Лига, по што јавно побара прошка за изјавите со кои летово го најави својот сон да игра за Барселона.
Атлетико одигра бледо прво полувреме на „Метрополитано“. Според Cadena SER, домаќините до одморот упатија седум удари, но ниту еден во рамките на голот. Депортиво, предводен од Јеремај, беше подобриот тим, а Јан Облак со нога го одбрани ударот на Аматучи и ги спаси „колчонерос“.
Дијего Симеоне на почетокот на второто полувреме направи две измени, а Ле Норман и Џулијано Симеоне влегоа наместо Пабло Бариос и Адемола Лукман. Ефектот беше веднаш видлив. Само една минута и десет секунди по продолжението, по убава акција на Љоренте, Баена и Грималдо, Алварез го прими центаршутот на Грималдо и одблизу ја испрати топката во мрежата за 1-0.
Тоа беше првиот гол на Аргентинецот во Ла Лига оваа сезона, а според Cadena SER, со него ја прекина и серијата од 357 дена без гол во првенството на „Метрополитано“. Публиката, која претходно редовно го исвиркуваше, овојпат го награди со овации.
Депортиво до последната секунда бараше израмнување. Кевин во судиското продолжение двапати имаше шанса за 1-1, а во последната акција на мечот Облак го одбрани неговиот удар речиси на самата гол-линија. Натпреварот го следеа 68.674 гледачи, пренесе Telemadrid.
По мечот Алварез се обрати за шпанската телевизија „Мовистар плус“. „Би сакал да им се извинам на нашите навивачи за она што го кажав на Светското првенство. Беше грешка и во начинот на кој го кажав и во моментот. Разбирам зошто навивачите се лути. Да бев навивач, и јас ќе бев лут, особено со оглед на тоа колку ме поддржуваа откако дојдов“, изјави Алварез, пренесува CNA.
„Се надевам дека со напорна работа и скромност ќе успеам да ја променам оваа ситуација. Во последните натпревари се чувствувам подобро, и физички и со топката. Сакам да му помогнам на тимот и да го дадам најдоброто од себе“, додаде тој. Тренерот Симеоне го пофали потегот: „Да побараш прошка не е лесно, му благодарам за тоа“.
Алварез за време на Светското првенство изјави дека сака да го оствари својот сон и да игра за Барселона, што предизвика трансферна сага која траеше цело лето, бидејќи Атлетико одби да го продаде на директен ривал. Со саботната победа Атлетико има 25 бода и привремено заостанува само два бода зад Барселона, која вечерва го пречекува Реал Мадрид.
