Американската групација Фридкин, сопственик на Евертон, официјално соопшти дека ја разгледува можноста за продажба на контролниот пакет акции во англискиот клуб. Одлуката доаѓа помалку од две години откако Фридкин го презеде клубот од Фархад Мошири во декември 2024 година.
„Групацијата Фридкин истражува нови инвестициски опции за Фудбалскиот клуб Евертон, вклучително и можна продажба на контролниот удел“, се вели во соопштението објавено во петокот наутро.
Од групацијата потсетија дека кога го презеле клубот, Евертон се соочувал со сериозна финансиска неизвесност и проблеми на теренот и надвор од него. Приоритет, според нив, биле стабилноста и довршувањето на долго ветуваниот нов стадион, кој беше отворен минатата година. „Со тоа што основата сега е безбедно поставена, дојде вистинското време да се размисли за следното поглавје на Евертон“, напишаа од Фридкин.
Сопствениците додадоа дека ќе разговараат само со заинтересирани страни за кои цврсто веруваат дека ќе бидат вистински чувари на клубот и ќе го продолжат започнатиот напредок. Додека трае процесот, ниту групацијата ниту клубот нема дополнително да го коментираат процесот.
Според Би-би-си, Фридкин откупи 99,5 отсто од клубот во зделка вредна над 400 милиони фунти. Ден Фридкин, кој живее во Хјустон и е сопственик и на Рома, секојдневното водење на клубот им го препушти на својот зет Риши Маџитија и на извршниот директор Ангус Кинер. Тренерот Дејвид Мојс во септември откри дека од враќањето на клупата во јануари 2025 година ниту еднаш не се сретнал ниту разговарал со сопственикот.
Односите со навивачите се влошија во летниот преоден рок, кога клубот прво прифати понуда од 40 милиони фунти од Нотингем Форест за младиот репрезентативец до 19 години Харисон Армстронг, а потоа се повлече од зделката. Евертон го продаде Бето во Фиорентина, а Илиман Нџаје замина во Манчестер Сити за 65 милиони фунти, па Мојс остана само со еден препознатлив напаѓач, Тиерно Бари.
И покрај сите проблеми, Евертон по седум кола е на седмото место во Премиер лигата. Поранешната голманка на клубот Рејчел Браун-Финис за Би-би-си изјави дека веста е „мал шок“, бидејќи американските сопственици го стабилизирале клубот и го оставаат во многу подобра состојба од онаа во која го затекнале.
Извори: BBC Sport, Sky Sports
