Баерн Минхен на најдобар можен начин одговори на критиките по двете последователни ремија. Шампионот во саботата на „Алијанц Арена“ го прегази РБ Лајпциг со 6-1 во шестото коло од Бундеслигата, а вечерта им припадна на Луис Дијаз, кој постигна хет-трик, и на Хари Кејн, кој го одбележа својот 100ти натпревар во германското првенство.
Тимот на Венсан Компани на дуелот дојде по ремијата 2-2 со Аугсбург во првенството и 3-3 со норвешкиот Викинг во Лигата на шампионите, резултати што отворија прашања за одбраната на Баварците. Против Лајпциг, Баерн доминираше од првата минута.
Во 12тата минута Јозуа Кимих со прецизно додавање го проигра Дијаз, кој ја надмудри одбраната и го матираше голманот Мартен Вандевоорт. Колумбиецот потоа се најде во улога на асистент и во 26тата минута му додаде на Александар Павловиќ, кој со силен удар покрај блиската статива зголеми на 2-0.
Осум минути подоцна Мајкл Олисе, по брза акција во која учествуваа Конрад Лајмер и Кејн, погоди од работ на казнениот простор за 3-0 на полувремето.
Лајпциг немаше одговор ниту по паузата. Само 95 секунди по почетокот на второто полувреме Кејн го проигра Дијаз, кој со прецизен удар погоди во далечниот долен агол. Во 53тата минута Кејн се запиша и меѓу стрелците, кога одблиску ја смести топката во мрежата по повратното додавање на Натаниел Браун.
Дијаз го комплетираше хет-трикот во 69тата минута со силен удар од работ на казнениот простор по кратко изведен корнер и додавање на Олисе. Лајпциг до почесниот погодок стигна во судиското продолжение, кога резервистот Андрија Максимовиќ погоди во горниот агол.
Кејн, кој постигна гол и забележа две асистенции, беше заменет во 59тата минута, бидејќи Компани реши да го поштеди пред средбата со Арсенал во Лигата на шампионите во среда. Според Бундеслигата, Англичанецот има 102 гола на своите први 100 натпревари во германското првенство, а во дресот на Баерн постигна 155 погодоци на 157 натпревари во сите натпреварувања.
Лајпциг го упати првиот удар во рамките на голот дури во 78мата минута, а дотогаш Баерн имаше 17 удари во рамките на голот. Резултатот можеше да биде и поубедлив да не беше Вандевоорт, кој забележа 11 одбрани, објави Би-би-си. Меѓу стативите на Баерн беше Јонас Урбиг.
Со оваа победа Баерн се искачи на првото место со 14 бода, откако Борусија Дортмунд претходно одигра 0-0 со Унион Берлин. Фрајбург може да се врати на врвот со два бода предност доколку во недела го победи Баер Леверкузен. Лајпциг, кој ги доби сите три натпревари на домашен терен, а ги загуби сите три на гостувањата, е седми.
