Аталанта доживеа болен пораз во второто коло од лигашката фаза на Лигата на конференциите. Тимот на Маурицио Сари загуби од Ајакс со 2-0 на „Јохан Кројф Арена“, а двата гола на домаќините беа постигнати во последните минути, откако резултатот долго време беше без голови.
Македонскиот репрезентативец Елиф Елмас беше во стартната постава на италијанскиот тим. Тој го напушти теренот во завршницата, при резултат 0-0, а неколку минути подоцна Ајакс ги постигна двата гола. Италијанската „Скај Спорт“ му даде оценка 5 во оценувањето на играчите.
Првото полувреме заврши без погодоци, а во него се истакна голманот на Аталанта, Марко Карнесеки, кој неколку пати ги спречи напаѓачите на Ајакс. Домаќините имаа и поништен гол на младиот Мокио, бидејќи Дави Класен во текот на акцијата беше во офсајд. Околу 60тата минута гостите бараа пенал по падот на Никола Залевски, но по проверката со ВАР судијата не досуди казнен удар.
Сари реагираше со измени во второто полувреме. Во 61вата минута влезе Лазар Самарџиќ, во 71вата минута Никола Крстовиќ, а подоцна во игра влегоа и Роу и Марио Пашалиќ. Сепак, промените не донесоа гол за италијанскиот тим.
Ајакс го искористи финишот на натпреварот. Двајцата резервисти ја решија средбата, пренесува Гол. Нигериецот Толу Арокодаре постигна гол во 87мата минута по долга топка од Јури Баас, а во судиското продолжение 17-годишниот Абдела Уазан, по асистенција на Толу, ја погоди долната страна на пречката и го постави конечниот резултат.
Ова е прва победа за Ајакс во новото издание на Лигата на конференциите, откако во првото коло тимот загуби од Хајдук во Сплит со 2-1. Холанѓаните со ова ја прекинаа и лошата серија против италијанските клубови во Европа.
По натпреварот Сари не го криеше незадоволството. Тренерот на Аталанта изјави дека во соблекувалната владеат „бес и разочарување, но без очај“, пишува италијанскиот Кориере дела Сера, кој нагласува дека тимот од Бергамо доживеа неуспех и во Европа.
Елмас и Аталанта сега мораат брзо да се свртат кон обврските во италијанското првенство, а следниот натпревар во Лигата на конференциите ќе го играат на почетокот на ноември, кога ќе бараат начин да ги надоместат изгубените бодови од Амстердам.
