Претседателот на ФИФА, Џани Инфантино, тврди дека ја има поддршката на „огромното, огромното мнозинство“ од светскиот фудбал. Во ретко интервју, тој со смеа ги отфрли прашањата дали размислувал за оставка поради контроверзниот предлог за продажба на дел од комерцијалните права на ФИФА.
„Нема ништо лошо во несогласувањето. Тоа го гледаме секој ден во многу земји. Во ред е да не се согласуваме и да имаме различни ставови, но потоа треба да можеме да продолжиме понатаму“, изјави Инфантино за Би-Би-Си.
Пред два месеца Инфантино се соочи со сè поголеми повици да се повлече. Претседателите на УЕФА, Азиската фудбалска конфедерација и Конкакаф потпишаа писмо во кое го обвинија дека ја нарушил довербата „преку измама“. Според предлогот ФИФА Форвард Ентерпрајз, кој Инфантино го повлече по неколку дена, дел од комерцијалните права на натпреварувањата на ФИФА требаше да бидат продадени на приватна инвестициска компанија.
Минатата недела УЕФА побара ФИФА да ги објави сите клучни документи поврзани со предлогот до 2 ноември. Инфантино не даде јасен одговор кога ќе ги достави, туку рече дека мора да се почитува „правна процедура“ и дека „работат на тоа“.
На прашањето дали е соодветен за функцијата и дали размислувал да се повлече, Инфантино се насмеа и рече: „Знаете, бев избран од 211 национални асоцијации од целиот свет. Ако сме сериозни за демократијата, дека секој има ист глас и дека фудбалот им припаѓа на сите, тогаш треба да ги почитуваме и ставовите на огромното мнозинство.“
Тој истакна дека Азиската фудбалска конфедерација целосно го поддржала по средбата во Токио, како и сите земји од Африка. Претходно, тој се извини пред Советот на ФИФА за „комуникацијата и консултациите“ околу предлогот и призна дека ФИФА направила „некои работи кои можеби не биле толку добри“.
Интервјуто е дадено во Баку, каде што се одржува првото Светско првенство до 15 години, на кое настапува и Македонија. Рокот за кандидатите што сакаат да му се спротивстават на Инфантино на изборите во март е 18 ноември, а засега никој не се пријавил.
