Италија вечерва од 20:45 часот на стадионот „Ренато Дал’Ара“ во Болоња ја пречекува Турција во четвртото коло од групата 1 во Лигата А на Лигата на нациите. Селекторот Роберто Манчини имаше 30 фудбалери на располагање, па мораше седуммина да остави надвор од списокот за натпреварот, пишува Football Italia.
Надвор од списокот останаа Масимо Песина, Еди Куадио, Даниеле Гиларди, Диего Копола, Самуеле Ричи, Роландо Мандрагора и Мохамед Али Зома. Во списокот првпат во овој прозорец влезе 18-годишниот Самуеле Инасио од Борусија Дортмунд, кој дебитираше за Италија во јуни, но само на пријателски натпревар, па сè уште има право да игра и за Бразил.
Пред последниот натпревар од октомврискиот прозорец Франција води со седум бода, Белгија има шест, Италија четири, а Турција сè уште е без бод. Азурите почнаа со пораз од 0-2 против Белгија на „Олимпико“, потоа ја совладаа Турција со 4-1 во Бурса, а во петокот извлекоа 1-1 против Франција на „Стад де Франс“, кога Алесандро Бастони одговори на голот на Мајкл Олисе од слободен удар, пренесува Tuttosport.
Манчини најави нови промени во составот. Според La Gazzetta dello Sport, Николо Барела се враќа во стартната постава, а шанса треба да добијат Џанлука Манчини, Матео Руџери, Вергара, а можеби и Романо и Думбија. Азурите ќе играат и без Мојсе Кин, кој го напушти подготвителниот камп.
Турција доаѓа во Болоња во длабока криза. Тимот на Винченцо Монтела ги загуби сите три натпревари во групата: 0-1 дома против Франција, 1-4 против Италија и 0-3 во последното коло во Белгија. Монтела има пет порази во последните шест натпревари.
Италијанскиот стручњак на клупата на Турција мора да се снаоѓа и без тројца клучни играчи. Хакан Чалханоглу и Кенан Јилдиз се повредени, а Арда Гулер е суспендиран, пишува италијанскиот спортски дневник.
Натпреварот ќе го суди Полјакот Шимон Марчињак. Со победа Италија би го зацврстила најмалку третото место во групата, а при пораз на Белгија во Париз, каде вечерва гостува кај Франција, Азурите би можеле да се искачат и на второто место пред завршницата на групата во ноември.
