Саул Канело Алварез и Кристијан Мбили успешно го поминаа официјалното мерење пред вечерашната борба за титулата на ВБЦ во суперсредна категорија во Ријад. Мбили тежеше 167,8 фунти (околу 76,1 килограм), а Канело 167,6 фунти (околу 76 килограми), при што двајцата беа под границата од 168 фунти, пренесува Боксинг сцена.
Французинот Мбили е актуелен носител на појасот и влегува во борбата со скор од 29 победи, едно реми и без пораз, со 24 нокаути. Мексиканецот Канело има 63 победи, три порази и две ремија, со 39 нокаути, а овојпат е во улога на предизвикувач.
За 36-годишниот Канело ова е прв настап по поразот од Теренс Крафорд во септември минатата година.
Во втората главна борба на вечерта Хаиме Мунгија (46 победи и два порази) ќе се бори со Никита Зон (12 победи и едно реми) за појасот на ВБА во суперсредна категорија. Мунгија тежеше 167,4, а Зон 167,5 фунти. Рафаел Еспиноза (28 победи без пораз) ја брани титулата на ВБО во перолесна категорија против Бландон.
Кога почнува борбата
Боксерската вечер почнува во 17 часот по саудиско време, односно во 15 часот по македонско време, соопшти саудиската агенција СПА. Главниот дел од програмата почнува околу 19 часот, а излегувањето на Канело и Мбили во рингот се очекува околу 21:30 часот по македонско време, во зависност од траењето на претходните борби.
Боксерската вечер се одвива според планот и покрај напнатата безбедносна ситуација во регионот во текот на неделата. Линдолфо Делгадо одлучи да остане во САД и се откажа од шансата за титула, па неговата борба беше отстранета од програмата.
Борбата ќе се пренесува на платформата ДАЗН, а Канело ќе се обиде да се врати на тронот во категоријата во која доминираше со години.
