Голден Стејт Вориорс можат да здивнат. Стеф Кари, кој во неделата на отворениот тренинг за навивачите го истегна десниот скочен зглоб, во понеделникот целосно го одработи тренингот, а тренерот Стив Кер потврди дека ќе игра на отворањето на сезоната против Лос Анџелес Лејкерс во среда.
Кари го изврте зглобот при дриблинг по десното крило, во средината на натпреварот со полесно темпо на тренингот во Чејс центарот. Бекот веднаш ја прекина играта, луто ја удри топката од паркетот и куцајќи замина во соблекувалната пред загрижените соиграчи и неколку илјади навивачи. Повеќе не се врати во игра.
„Секогаш сум загрижен кога Стеф ќе излезе куцајќи. Но, отидов долу да видам како е и тој веднаш ми рече дека е добро“, изјави Кер, пренесува San Francisco Chronicle.
Според ESPN, зглобот добро реагирал во текот на ноќта, а медицинскиот штаб му дозволил да ги продолжи подготовките. Вориорс ќе тренираат и во вторник пред летот за Лос Анџелес, а во среда наутро ќе имаат уште еден тренинг пред натпреварот во Крипто.ком арената.
Отворено останува прашањето колку минути ќе игра Кари. Голден Стејт внимателно го враќа во форма по проблемите со десното колено од минатата сезона, а Кер претходно најави дека на почетокот на сезоната би можел да игра помалку од 32 минути по натпревар. Во предсезоната Кари имаше просек од 13 поени за нешто помалку од 18 минути, со 41,9 отсто успешност во шутот за три поени.
Кер, сепак, има и други проблеми. Брендин Подземски не тренираше ниту во неделата ниту во понеделникот поради болки во долниот дел од грбот, па неговиот настап против Лејкерс е под знак прашалник. Неизвесен е и настапот на центарот Чарлс Беси, кој има тендинитис во коленото. Кристапс Порзингис и понатаму отсуствува на неодредено време поради здравствени проблеми и нема да патува со тимот во Лос Анџелес, а крилните играчи Мозес Муди и Џими Батлер се опоравуваат од тешки повреди на коленото и нивното враќање се очекува во средината на сезоната.
Кари, кој во март ќе наполни 39 години, минатата сезона имаше просек од 26,6 поени, 4,7 асистенции и 3,6 скока, но одигра само 43 натпревари. Поради повредата на десното колено пропушти 27 натпревари по ред, а Вориорс не успеаја да стигнат до плејофот откако загубија од Финикс во плеј-ин турнирот, наведува NBA.com.
Минатиот месец Кари потпиша двегодишно продолжување на договорот, вредно 116 милиони долари. Тој влегува во својата 18та сезона во НБА лигата и веќе соопшти дека сака да ја заврши кариерата во Голден Стејт.
