Лионел Меси денеска на стадионот „Монументал“ во Буенос Аирес го игра последниот натпревар во дресот на Аргентина. Противник во пријателскиот дуел е Бенин, а на трибините се очекуваат 85.000 гледачи, пренесува Al Jazeera.
Триесет и деветгодишниот капитен се збогува како рекордер по настапи и најдобар стрелец во историјата на Аргентина, со 125 гола на 207 натпревари и рекордни 68 асистенции. Со репрезентацијата ги освои Светското првенство во 2022 година, две титули во Копа Америка и Финалисимата.
Збогувањето доаѓа два и пол месеци по финалето на Светското првенство во Њу Џерси, кое Аргентина го загуби од Шпанија, а Меси го напушти теренот во солзи. „Дадов сè од себе. Немам што повеќе да дадам, а покрај тоа доаѓаат одлични млади играчи кои ја заслужуваат својата шанса“, напиша Меси во август, кога ја објави одлуката да се повлече од репрезентацијата.
Меси има договор со Интер Мајами до 2028 година, но по смртта на неговиот татко Хорхе пред два месеци откри дека можеби ќе ја заврши кариерата порано од планираното.
На прошталниот натпревар ќе бидат и членовите на шампионскиот тим од Катар со своите семејства, меѓу кои и Анхел Ди Марија, кој од репрезентацијата се повлече во 2024 година. Во составот се и дел од новата генерација, како Франко Мастантуоно и Леонел Флорес, кои не беа ни родени кога Меси дебитираше за Аргентина во 2005 година.
„Ова ќе биде незаборавен ден за сите. Секој сака да биде на овој натпревар, а сега останува само да уживаме“, изјави селекторот Лионел Скалони. Тој истиот ден се збогува и со 38-годишниот вицекапитен Николас Отаменди, а за дуелот со Бенин беа повикани и Родриго де Пол и Џовани Ло Селсо, што отвора можност и тие да го одиграат последниот натпревар за Аргентина.
Капитенската лента по Меси треба да ја преземе Кристијан Ромеро, а во хиерархијата следуваат Емилијано Мартинес и Лаутаро Мартинес. Аргентина без Меси веќе ги совлада Боливија со 4-0 во Кордоба и Буркина Фасо со 7-0 на „Монументал“, а во саботата првите голови за репрезентацијата ги постигнаа Мастантуоно и Џанлука Престијани.
Отворено останува прашањето кој ќе го наследи дресот со бројот 10. „Нема да го дадеме бројот 10 никому додека не се одигра натпреварот на Лео. Потоа ќе видиме“, рече Скалони. Аргентинските навивачи, пишува The Washington Post, веруваат дека репрезентацијата има светла иднина и по заминувањето на нејзиниот најважен играч во последните две децении.
