Џани Инфантино најверојатно ќе го изгуби најсериозниот потенцијален противкандидат на изборите за претседател на ФИФА. Според ЕСПН, Гардијан и Би-би-си, Виктор Монталијани им соопштил на колегите дека ќе бара нов мандат на чело на КОНКАКАФ, што практично го исклучува од трката за првата функција во светскиот фудбал.
Канаѓанецот, кој е и потпретседател на ФИФА, во последните месеци се сметаше за кандидат со најголеми шанси да го победи Инфантино на изборите закажани за март. Според изворите на ЕСПН, 61-годишниот функционер ја соопштил одлуката на работилница со претставници на конфедерацијата на почетокот на октомври. Од КОНКАКАФ засега не ги потврдија информациите во одговор на прашањата на АФП.
Монталијани е претседател на КОНКАКАФ, конфедерацијата што ги обединува федерациите од Северна и Централна Америка и Карибите, од 2016 година. Тогаш ја презеде организацијата во период на стабилизација, по корупциските скандали во кои беа вмешани неговите двајца претходници. Изборите во КОНКАКАФ се закажани за почетокот на следната година, а ова би му бил последниот четиригодишен мандат.
Името на Монталијани се појави како опција по бурата околу планот на Инфантино да собере 20 милијарди долари преку делумна продажба на натпреварувањата на ФИФА, вклучително и Светското првенство. Инфантино се откажа од идејата неколку дена откако беше објавена во јули, по огромното незадоволство во фудбалскиот свет, а УЕФА дури се закануваше со бојкот на сите натпревари на ФИФА.
УЕФА, КОНКАКАФ и Азиската фудбалска конфедерација јавно му се спротивставија на Инфантино, а УЕФА почна да подготвува и правна постапка поради неуспешниот план. Од друга страна, африканската КАФ и јужноамериканската КОНМЕБОЛ остануваат лојални на актуелниот претседател, како и дел од азиските федерации, меѓу кои се Саудиска Арабија и Катар. ФИФА минатиот месец потврди дека Инфантино ќе се кандидира за четврти мандат.
Според ЕСПН, Монталијани никогаш формално не прифатил да се кандидира, но неговото повлекување е голем удар за противниците на Инфантино. Тие сега мора да најдат кредибилен кандидат до 18 ноември, кога истекува рокот за поднесување кандидатури. Инфантино, пак, според истиот извор, е сè посигурен дека ќе ги обезбеди потребните 106 гласа од вкупно 211 членки.
Засега единствениот што најави кандидатура е поранешниот репрезентативец на Швајцарија и играч на Тотенхем, Рамон Вега. Сепак, според ЕСПН, 55-годишниот Вега нема да може да се кандидира бидејќи правилата бараат кандидатот да има активна функција во фудбалот во најмалку две од последните пет години. Претседателот на УЕФА, Александер Чеферин, во меѓувреме реши да се кандидира за четврти мандат на чело на европската куќа.
