Второто коло од кошаркарската Суперлига донесе два големи пресврта во вторите полувремиња и единствена гостинска победа, која ја оствари шампионот. МЗТ Скопје Аеродром мораше добро да се испоти во Гевгелија за да го совлада Кожув, Работнички без проблеми го победи Тиквеш Голден Игл, а повратникот во елитата Куманово стигна до првата победа во сезоната.
Маслинко и Николиќ со по 19 поени за шампионот
МЗТ го совлада Кожув со 81-73 и ја забележа втората победа во новата сезона. Домаќините одиграа одлично прво полувреме, ја добија првата четвртина со 26-18, а на одмор заминаа со минимално водство од 43-42.
Во продолжението „штрковите“ го покажаа своето вистинско лице. Предводени од Андреј Маслинко, кој заврши со 19 поени и осум скока, и Димитрије Николиќ, кој постигна 19 поени и забележа шест скока, аеродромци ја презедоа контролата во третата четвртина, а најголемата предност изнесуваше 14 поени при резултат 63-77. Добра вест за тренерот Васко Атанасов е и враќањето на капитенот Војдан Стојановски по повредата. Тој постигна девет поени.
Работнички го реши натпреварот уште во првото полувреме
Работнички пред своите навивачи во салата „Градски парк“ немаше никакви проблеми против Тиквеш Голден Игл, поранешниот Фени Индустри, и победи со 86-70. „Црвено-белите“ почнаа фуриозно со серија од 9-0, а на полувремето водеа со убедливи 49-26.
Најефикасен кај Работнички беше репрезентативецот Виктор Ефремовски со 21 поен. Центарот Роберт Рикиќ забележа дабл-дабл со 14 поени и 13 скока, а плејмејкерот Дарин Говенс имаше 12 поени и 11 асистенции. Кај гостите од Кавадарци се истакнаа Тедерик Волф со 20 и Дејвион Сајкс со 18 поени.
Ѓуроски и Мекиќ го предводеа пресвртот против Штип
Куманово на домашен терен го совлада дебитантот Штип со 70-59, иако на полувремето заостануваше со 29-34. Гостите играа храбро, предводени од Камерон Хамилтон, кој заврши со 21 поен и девет скока, но во третата четвртина тимот на Марин Докузовски направи серија од 11-0 и го сврте резултатот во своја корист.
Главни носители на пресвртот беа репрезентативците Стојан Ѓуроски, со 16 поени и осум скока, и Адем Мекиќ, кој забележа 15 поени и девет асистенции. Претходно, во ова коло, ТФТ го доби скопското дерби против Скопје со 102-98, а колото го затвора дуелот меѓу Струмица и Пелистер.
