Кошаркарите на МЗТ Скопје Аеродром го доживеаја првиот пораз во новата сезона од АБА 2 лигата. Во второто коло од Групата Ц, македонскиот шампион загуби на гостувањето кај Сутјеска во Никшиќ со 85-75, по лошо одиграната последна четвртина.
Натпреварот започна со иницијатива на домаќините, но екипата од Аеродром силно одговори во вториот период, кој го доби со 29-23, и на полувреме замина со минимално водство од 40-39.
Изедначената битка продолжи и во третата четвртина, која Сутјеска ја доби со 21-19. Во последните десет минути домаќините целосно ја презедоа контролата, го добија тој дел од играта со 25-16 и стигнаа до победата.
Најефикасен кај МЗТ беше Ноа Фарахан со 18 поени, а Димитрије Николиќ додаде 17 поени и три скока. Искусниот Војдан Стојановски заврши со осум поени, додека Лука Стојановски и Лесли Варнер постигнаа по седум.
Кај Сутјеска незапирлив беше Стефан Митровиќ со 22 поени, а Филип Баровиќ додаде 16 поени и шест скока.
Поразот предизвика бран реакции кај навивачите на социјалните мрежи, кои го изразија своето незадоволство од играта и од бројот на странски засилувања во екипата.
Време за одмор нема. МЗТ во вторник, во салата „Јане Сандански“, го пречекува АЕК Ларнака во ФИБА Европа купот, а само два дена подоцна, во четврток, гостува во Струмица во домашната Суперлига.
Табелата и распоредот на регионалното натпреварување се достапни на официјалната страница на АБА лигата.
