Манчестер Јунајтед, по понижувањето со 4-1 во Комо и јавната расправа меѓу капитенот Бруно Фернандеш и тренерот Мајкл Карик, се соочува со уште една лоша вест. Словенечкиот напаѓач Бенјамин Шешко, според англиските медиуми, би можел да отсуствува до новата година.
Како што пишува Сан, во клубот се загрижени дека 23-годишниот напаѓач би можел да биде надвор од теренот до четири месеци. Шешко не игра веќе пет недели, а станува збор за нов проблем, различен од повредата на потколеницата што го мачеше шест месеци. Извори блиски до играчот се надеваат дека паузата нема да трае до февруари, но се подготвени за подолго отсуство. Клубот официјално не соопшти ниту дијагноза ниту рок за враќање.
Карик во вторникот најави дека наскоро ќе има појасна слика. „Се надеваме дека многу брзо ќе имаме јасна слика. Не се обидувам да одолговлекувам. Се надевам дека следниот пат кога ќе зборуваме, можеби не утре, но до крајот на неделата, ќе имаме нешто појасно. Во моментов се работи на тоа, па ќе видиме што ќе произлезе“, изјави тренерот на Јунајтед.
Словенечкиот јавен сервис РТВ Словенија потсетува дека Карик уште пред две недели изјави оти не станува збор за истата повреда на потколеницата од мај, туку за проблем на слично место. Шешко во дебитантската сезона на „Олд Трафорд“ постигна 12 гола, а поради проблемите со повредите ги пропушти и последните собири на репрезентацијата на Словенија, меѓу кои и септемврискиот натпревар против Македонија.
Отсуството на Шешко го остава Јунајтед без вистински центарфор. Според Сан, Џошуа Зирзи има само еден настап како стартер во 27 натпревари под водство на Карик, а клубот во летниот преоден рок не донесе резервен напаѓач бидејќи не успеа да го продаде Холанѓанецот. Матеус Куња ја почна сезоната на позицијата деветка, но во меѓувреме го замени Брајан Мбеумо, кој со четири гола е еден од најдобрите стрелци на тимот. Англискиот весник пишува дека Јунајтед би можел да бара напаѓач во зимскиот преоден рок.
Поразот во Комо ја продолжи црната серија на Јунајтед на седум натпревари без победа во сите натпреварувања. По мечот, Фернандеш изјави дека одлуката тимот да не врши притисок човек на човек била „одлука на стручниот штаб“, а Карик одговори: „Која и да е тактиката, ако не трчате назад, нема да победите“, пренесува Скај Спортс.
Тимот на Карик во недела го пречекува Борнмут во Премиер лигата, а тренерот на прес-конференцијата пред тој натпревар треба да даде нови информации за состојбата на Шешко.
