Ракометарите на Охрид вечерва ја почнуваат одбраната на трофејот во Европскиот куп на ЕХФ. Во второто коло македонскиот европски шампион го пречекува турскиот Спор Тото, а двата натпревари ќе се одиграат во Охрид, во спортската сала „Билјанини Извори“.
Првиот меч е закажан за денеска, а реваншот за утре, двата со почеток во 18:30 часот. Европската ракометна федерација во најавата на колото посебно го истакна дебито на бранителот на титулата, кој оваа сезона за првпат излегува на терен во натпреварувањето.
Охрид во мај оваа година за првпат во историјата стана првак на Европскиот куп, што е една од најголемите клупски титули во македонскиот ракомет. Токму поради тоа клубот директно се пласираше во второто коло, без настап во првата квалификациска фаза.
Составот од минатата сезона, сепак, е значително изменет, наведува официјалниот портал на ЕХФ Европскиот куп. Голманот Кристијан Пилиповиќ, кој беше одличен во финалниот двомеч, замина во швајцарскиот Кријенс-Луцерн, учесник во Лигата на шампионите. Клубот го напуштија и Вуко Борозан, Косуке Јасухира и Ѓанфранко Прибетиќ.
Охрид во текот на летото доведе и засилувања. Хрватскиот репрезентативец Дино Славиќ го зазеде местото на Пилиповиќ меѓу стативите, Доминик Мате носи искуство од Лигата на шампионите со Елверум и Пари Сен Жермен, а Адама Кеита неколку сезони играше во Европскиот куп во дресот на АЕК.
Во второто коло учествуваат 64 екипи од 32 земји, меѓу кои и шест поранешни освојувачи на трофејот. Покрај Охрид, тоа се Потаиса Турда, АЕК, Нербе, Војводина и Алкалоид, наведува Европската ракометна федерација.
Спор Тото е еден од четирите турски претставници во ова коло. Охрид, како бранител на титулата, влегува во двомечот како фаворит, а победникот по двата натпревари ќе продолжи во третото коло од натпреварувањето.
За македонскиот ракомет ова е викенд со дополнителна европска тежина, бидејќи и Алкалоид, првакот на Европскиот куп од 2025 година, игра реванш во второто коло со предност од девет гола од првиот натпревар против австрискиот Ферлах.
