Оклахома Сити Тандер постигна договор со бекот Кејсон Волас за петгодишно продолжување на соработката во вредност од 139 милиони долари. Веста ја објави Шамс Чарања од ESPN, а договорот е постигнат само еден ден пред рокот за продолжување на договорите на играчите избрани во првата рунда на драфтот, кој истекува денеска.
Новиот договор стапува на сила од сезоната 2027/28 и ќе го задржи 22-годишниот бек во Оклахома до сезоната 2031/32. Просечната годишна вредност изнесува околу 28 милиони долари, а без ова продолжување Волас следното лето ќе станеше ограничен слободен играч и ќе можеше да добие понуди од други клубови.
Волас беше избран како 10ти пик на драфтот во 2023 година од Универзитетот Кентаки, а својата вредност ја изгради пред сè во одбраната. Минатата сезона беше прв во лигата по вкупниот број украдени топки (150) и по допрени топки во одбраната (339), а трет по украдени топки на натпревар (1,9). Беше избран во втората идеална одбранбена петорка, а во гласањето за најдобар одбранбен играч на сезоната заврши на седмото место.
Во нападот бројките му се поскромни. Во третата сезона во лигата, во која одигра 77 натпревари, бележеше 8,6 поени на натпревар, малку повеќе од 8,4 во втората сезона. Во кариерата шутира со 37,4 отсто успешност за три поени и во ниту една сезона не падна под 35 отсто, што ќе им овозможи повеќе простор на креаторите Шеј Гилџес-Александер и Џејлен Вилијамс.
По заминувањето на Лугенц Дорт, кој летово беше разменет во Атланта, се очекува Волас да го преземе неговото место во стартната петорка покрај Гилџес-Александер. Оклахома летово се раздели и со Арон Вигинс и Ајзаја Џо, со потези со кои клубот ги намалуваше трошоците за да го зачува јадрото на тимот.
Со потписот на Волас, сите пет стартери на Тандер, Гилџес-Александер, Вилијамс, Чет Холмгрен, Ајзаја Хартенштајн и Волас, имаат повеќегодишни договори, а Алекс Карусо има договор за уште три сезони. Според Hoops Rumors, клубот во сезоната 2027/28 ќе биде над втората граница на луксузниот данок и ќе се соочи со голема сметка доколку подоцна не го намали платниот список.
Просечната годишна вредност на договорот е речиси точно на средина меѓу четиригодишниот договор од 100 милиони долари што минатата есен го доби Дајсон Даниелс и петгодишниот договор од 155 милиони долари на Аусар Томпсон. Волас е шестиот играч од генерацијата на драфтот во 2023 година кој договорил продолжување на соработката пред рокот, по Виктор Вембањама, Кејонте Џорџ, Брандин Подзиемски и близнаците Аусар и Амен Томпсон.
Оклахома ја отвора новата сезона утре со гостување кај Сан Антонио, во реприза на минатогодишното финале на Западната конференција. Натпреварот е закажан за 3:30 часот по македонско време, во ноќта меѓу вторник и среда. Деталите за договорот ги пренесоа NBA.com и Hoops Rumors.
