Шпанскиот напаѓач Педро Родригез во среда ја објави одлуката да ја заврши професионалната кариера. Триесет и деветгодишниот Канаринец беше без клуб откако на 30 јуни му истече договорот со Лацио, а од фудбалот се збогува со порака на социјалните мрежи, објави AS.
„Чувствувам дека дојде моментот. Моментот да направам чекор напред и да започнам нова етапа во мојот живот. Си заминувам горд што го живеев својот сон и благодарен на сите луѓе кои беа покрај мене за тој да се оствари. Благодарам, фудбалу, што ме направи толку среќен“, напиша Педро.
Од Тенерифе до Ла Масија
Педро пристигна во Барселона од Тенерифе на 17 години и помина низ младинските селекции и Барселона Б. Дебито за првиот тим го имаше во сезоната 2007/08, на 12 јануари 2008 година против Реал Мурсија, со бројот 33 и името Педрито на дресот, а првиот професионален договор со првиот тим го потпиша летото 2009 година.
Веднаш остави белег. Во сезоната 2009/10 стана првиот фудбалер кој постигнал гол во сите шест официјални натпреварувања на Барселона во иста сезона: Ла Лига, Купот на кралот, Лигата на шампионите, шпанскиот Суперкуп, европскиот Суперкуп и Светското клупско првенство, потсетува FC Barcelona.
Еден од најпаметените моменти го доживеа на 28 мај 2011 година на „Вембли“, кога го постигна првиот гол во финалето на Лигата на шампионите против Манчестер Јунајтед, кое Барселона го доби со 3-1. Под водство на Пеп Гвардиола со каталонскиот клуб освои сè што можеше да се освои, а за Барселона постигна 99 гола.
Челзи, Рома и Лацио
Летото 2015 година се пресели во Челзи, а потоа играше за Рома и Лацио, за кој собра повеќе од 200 настапи. Во целата кариера, вклучувајќи ја и репрезентацијата, одигра вкупно 841 натпревар, наведува El País. Освои 26 трофеи со Барселона, Челзи и Шпанија, меѓу кои Светското првенство 2010 и Европското првенство 2012 година.
Со неговото заминување речиси целата генерација која во 2010 година стана светски шампион со Шпанија ги закачи копачките. Активни се уште Раул Албиол, Хуан Мата, Хави Мартинез и Серхио Рамос, но и четворицата во моментов се без клуб.
Педро официјално ќе се збогува на свечен настан во петок, 9 октомври, во „Аудиториумот 1899“ во Барселона, со почеток во 11:30 часот.
