Басконија ја направи првата голема промена на тренерската клупа оваа сезона. Шпанскиот клуб во средата го отпушти италијанскиот тренер Паоло Галбијати, а 20 минути подоцна објави дека новиот-стар шеф на стручниот штаб е Хрватот Велимир Перасовиќ, објави ACB.
Перасовиќ потпиша договор до 2028 година, односно за следните две сезони. Тој во четврток пристигнува во Виторија, а веќе во петок ќе ја води екипата на натпреварот од Евролигата против Виртус Болоња.
Галбијати ја плати цената за слабиот старт во Евролигата. Басконија во вторникот загуби од Дубаи и има само една победа и четири порази по пет кола. Сепак, во шпанската АЦБ лига тимот е лидер и сè уште е без пораз по три кола, пишува El País.
„Басконија и Паоло Галбијати ја завршуваат соработката што ги поврзуваше од август 2025 година. Клубот денеска му ја соопшти на тренерот одлуката да го раскине договорот“, се вели во соопштението на клубот, кој му се заблагодари на Италијанецот за работата и му посака среќа во иднина.
Галбијати ја водеше Басконија на 87 натпревари, од кои 43 во Евролигата, 40 во АЦБ лигата и четири во Суперкупот и Купот на кралот. Токму Купот на кралот го освои во февруари, со што го врати трофејот во Виторија по 17 години чекање. По поразот од Дубаи, тој се пожали на „недостиг на инвестиции и искуство“ во составот.
Нестабилноста во клубот е видлива и во играчкиот кадар. Басконија се раздели со Алекс Лен без тој да одигра ниту еден натпревар, а клубот по четири сезони го напушти и плејмејкерот Маркус Хауард, пренесува Eurohoops.
Перасовиќ, роден во Сплит во 1965 година, добро ја познава Басконија. Тој веќе ја водеше од 2005 до 2007 година, во сезоната 2015/16 и во сезоната 2018/19. Со 253 натпревари на клупата, тој е вториот тренер со најмногу водени средби во историјата на клубот.
Со Перасовиќ, Басконија ги освои Купот на кралот и Суперкупот на Шпанија, а во 2016 година стигна до завршниот турнир на Евролигата, што е последниот пласман на клубот на Фајнал фор. Хрватскиот стручњак во последните години го водеше рускиот Уникс Казан, а летово ја искористи откупната клаузула за да се ослободи од тој договор.
