Третото коло од македонската кошаркарска Суперлига заврши со драматични натпревари. Работнички по голем пресврт го совлада Пелистер во Битола со 91-87 и стигна до третата победа во исто толку натпревари, Скопје 2023 ја прослави првата победа во сезоната против Струмица со 83-68, а Куманово славеше кај Тиквеш во Кавадарци со 76-75.
Работнички славеше во Битола со 91-87
Пелистер подобро го одигра првото полувреме и на одмор замина со осум поени предност (41-33), а во еден момент Работнички заостануваше и со 14 поени. Скопјани во продолжението заиграа многу подобро и третата четвртина ја добија со 26-18, со што целосно се вратија во натпреварот.
Последните десет минути беа вистинска резултатска битка. Гостите првпат поведоа во завршниот период и изградија двоцифрена предност, но Пелистер не се откажа и на помалку од една минута до крајот изедначи на 83-83. Работнички остана смирен во клучните напади и ги искористи своите можности за конечни 91-87. Најдобар во победничкиот тим беше Виктор Ефремовски со 22 поени.
Џонс со 32 поени за првата победа на Скопје 2023
Скопје 2023 ја оправда улогата на фаворит и стигна до првата победа во првенството. Убедливо најефикасен на теренот беше Камерон Џонс со 32 поени, Паркер додаде 21, а Миловановиќ 12 поени. Кај Струмица најефикасни беа Пандев и Крафорд со по 18 поени.
Домаќините ги поставија темелите на победата уште во првото полувреме, кое го добија со 40-32. Третата четвртина ја добија со 25-16 и во последните десет минути влегоа со 17 поени предност. Струмица ја доби последната четвртина со 20-18, но тоа беше доволно само за ублажување на поразот.
Куманово со пресврт во Кавадарци
Тиквеш одлично го почна натпреварот и првата четвртина ја доби со 21-17, со највисока предност од седум поени, а на полувремето водеше со 37-35. Тимот на Докузовски ја презеде иницијативата во третата четвртина, која ја доби со 18-13, а во последниот период водството постојано се менуваше, при што кавадарчани стигнаа и до пет поени предност.
Искусните Ѓуроски и Камерон Гуден во финишот ги искористија слободните фрлања за целосен пресврт, а Тиквеш имаше последен напад за победа, но ударите на Глигоријевиќ и Златев не завршија во кошот. Гуден со 21 поен беше најефикасен кај Куманово, Андреја Стевановиќ додаде 15, а кај домаќините Сјукс постигна 27, а Смит 20 поени.
По три кола, Работнички и шампионот МЗТ, кој во дербито го совлада ТФТ со 70-66, се единствените тимови со максимален учинок во Суперлигата.
