Кристијано Роналдо имаше вечер за заборав на првиот натпревар откако Португалската фудбалска федерација го казни со 30 дена суспензија и парична казна од 255 евра. Ал Наср сепак го совлада Неом со 1-0 во Саудиската про лига, а победата ја донесе неговиот сонародник Жоао Феликс.
Роналдо имаше шанса да ги доведе домаќините во водство во судиското надополнување на првото полувреме, откако одбранбениот играч на Неом, Мохамед Ал Досари, го собори Феликс во казнениот простор. Според ЕСПН, 41-годишниот напаѓач шутираше покрај голот, а тоа му беше четврти промашен пенал од вкупно 31 изведен за Ал Наср во првенството.
Лошата вечер продолжи и по паузата. Само три минути по почетокот на второто полувреме, Роналдо од неколку метри ја испрати топката над празниот гол по додавање со глава на Садио Мане, а подоцна промаши и со удар со глава. Така, тој остана на 981 гол во кариерата во потрагата по историските 1.000, пренесува Галф њуз.
Ал Наср стигна до победата во 61вата минута. Феликс ја прими топката на работ на казнениот простор по додавање на Анжело и со силен удар ја затресе мрежата. Неом не успеа да одговори, а тимот на Енџи Постекоглу стигна до седмата победа во првенството.
Постекоглу застана во одбрана на својот капитен. „Тоа е природата на фудбалот и добро е што создаваме толку многу шанси, а ќе работиме за да ги поправиме грешките. Работиме како семејство, па победата е добра за сите, а поразот паѓа на целиот тим. Мораме да се поддржуваме и да одиме напред“, изјави австралискиот тренер, пренесува Национал.
Ал Наср со 22 бода е на третото место, три бода зад лидерот Ал Кадсија, кој има натпревар повеќе, откако Тијани Рајндерс во 96тата минута донесе победа против Ал Тавун. Ал Кадсија во петок ќе го пречека Ал Хилал во дуел на врвот.
Роналдо во понеделникот беше казнет од Дисциплинскиот совет на ФПФ поради напуштањето на кампот на репрезентацијата пред натпреварот со Данска. Според ЕСПН, ако суспензијата се смета од моментот на изрекувањето на привремената мерка, тој ќе биде на располагање за следниот натпревар на Португалија, повторно против Данска, на 14 ноември. Сепак, новинарот на Си-Ен-Ен Португалија, Руи Сантос, тврди дека Роналдо најверојатно нема да се врати во репрезентацијата и дека претпочита да не биде повикан, бидејќи смета дека бил предаден.
