Манчестер Сити ќе мора да се снаоѓа без Антоан Семењо во наредните два месеца. Тренерот Енцо Мареска на прес-конференцијата пред утрешниот натпревар од Лигата на шампионите против АЕК потврди дека ганскиот репрезентативец ќе отсуствува околу осум недели, а под знак прашалник е и настапот на Ерлинг Халанд.
Семењо се повреди во завршницата на саботниот натпревар, во победата од 3-2 над Ипсвич, со која Сити стигна до седмата победа во седум кола на стартот од сезоната во Премиер лигата. Крилниот напаѓач во неделата беше на прегледи, кои ја покажаа сериозноста на повредата на коленото.
„Останатите се повеќе или помалку во ред. Единствениот што ќе отсуствува, веројатно осум недели, е Антоан. Во првиот момент очекувавме уште потешка повреда, па бевме позагрижени. По вчерашните прегледи сме многу помирни, бидејќи не е толку сериозно како што очекувавме. Кога ќе се врати, околу декември, ќе биде како нов играч во однос на енергијата“, изјави Мареска, пренесува официјалниот сајт на Манчестер Сити.
Италијанецот појасни дека не станува збор за мускулна повреда. Според неговите зборови, Семењо бил еден од играчите на кои стручниот штаб сакал да им даде одмор, но влегол во игра во последните минути и тогаш се повредил.
Подобра е веста за Халанд, кој против Ипсвич постигна два гола, но во судиското надополнување имаше судир со Џек Кларк и го напушти теренот куцајќи. Норвежанецот сезонава има 12 гола на 12 натпревари, а според Индипендент, неговиот настап ќе зависи од денешниот тренинг.
„Може да биде достапен, ќе видиме. Сега имаме тренинг, а по натпреварот имавме одредени сомнежи. Вчера беше доста подобро. Секогаш е тешко да се замени Ерлинг, но имаме различни опции. Зависи и од планот за натпреварот, а постои шанса утре да биде на располагање“, рече Мареска.
Тренерот на Сити беше прашан и дали Фил Фоден, кој против Ипсвич го прекина низот од 35 натпревари без гол, може да игра како централен напаѓач. „Да, Фил може да биде едно од решенијата, но не и единственото. Веќе играл на таа позиција во минатото. Но, во моментов број девет е Ерлинг. Зошто да размислуваме за друг напаѓач кога Ерлинг е тука“, одговори Мареска.
Сити во Лигата на шампионите бара реакција по поразот од ПСЖ со 2-4 во претходното коло. Натпреварот против АЕК, кој го води Марко Николиќ, се игра утре од 21 часот на „Етихад“. Мареска најави дека ќе направи неколку промени во составот, но нагласи дека целта останува иста: победа.
