Поранешниот тренер на Манчестер Јунајтед, Ерик тен Хаг, повторно ги отвори старите рани од својот престој на Олд Трафорд. Во интервју за The Athletic, Холанѓанецот тврди дека Кристијано Роналдо за време на својот втор престој во англискиот клуб не се подготвувал доволно, избегнувал тренинзи и на натпреварите не можел да го даде она што тимот го очекувал од него.
„Тој го изневери тимот и ме изневери мене, бидејќи планиравме со него. Пред да дојдам во Јунајтед, летав во Португалија за да разговарам со него за тоа што сакам да постигнам. Очигледно, тој е еден од најдобрите во историјата на фудбалот и многу го почитував. Но, во тој момент, како тренер, морав да донесам рационална одлука“, изјави Тен Хаг, пренесува ESPN.
Според Холанѓанецот, Роналдо на тренинзите не го подигнувал пулсот до потребното ниво, а по катастрофалниот пораз од Брентфорд со 0-4 во август 2022 година не ги истрчал сите кругови што тренерот им ги одредил на играчите како казна.
„Многупати му велев: Рони, сите сакаат да работат за тебе, за да те доведат во вистинската позиција, но ако самиот не можеш да стигнеш во шеснаесетникот, не можеш да постигнеш гол. Тој не беше способен за тоа. Погрешно е да ми се префрла дека сум очекувал да пресира и дека затоа бил исцрпен. Тој не можеше. Не трчаше ниту кога имавме топка, ниту кога ја немавме. Причината беше што не се подготвуваше“, објасни Тен Хаг.
Поранешниот тренер на Ајакс тврди дека португалскиот напаѓач им давал погрешен пример на соиграчите. „Им велеше на играчите да ги штедат нозете на тренинзите. Тоа го разбирам кога си во врвна форма, тогаш може да штедиш нозе на некои тренинзи. Но, прво мора да тренираш за да стигнеш до потребното ниво на кондиција. Секој врвен тим мора да го прифати врвниот играч, но и врвниот играч мора да работи за тимот“, рече тој.
Во интервјуто Тен Хаг се осврна и на трансферите што не успеал да ги реализира во Манчестер. Тој тврди дека се залагал за доаѓањето на Френки де Јонг, Деклан Рајс и Хари Кејн, но дека преговорите не биле во негови раце. „Сите мислат дека тренерот ги води преговорите и дека е вклучен во финансиските прашања, но јас никогаш не бев“, изјави Холанѓанецот, наведува 101 Great Goals. За Кејн додаде дека слушнал оти напаѓачот бил многу позитивно расположен за преминот, но дека тој лично никогаш не разговарал со него.
Роналдо се врати во Манчестер Јунајтед во 2021 година, а неговиот втор престој заврши во ноември 2022 година, кога по јавните критики кон клубот и раководството му беше раскинат договорот, по што премина во саудискиот Ал Наср. Тен Хаг беше отпуштен во 2024 година, а денес е технички директор на холандскиот Твенте. Во меѓувреме, Јунајтед го смени и неговиот наследник Рубен Аморим, а сега тимот го води Мајкл Карик.
Интервјуто излегува во период кога Роналдо повторно е во центарот на вниманието. Португалската фудбалска федерација во понеделникот го суспендира на 30 дена и го казни со 255 евра поради напуштањето на репрезентацијата за време на последната пауза, а 41-годишниот напаѓач порача дека е подготвен повторно да игра за Португалија доколку биде повикан.
