Дисциплинската комисија на Турската фудбалска федерација (ТФФ) им изрече суспензии од по 45 дена на 147 сегашни и поранешни клупски функционери поради прекршување на правилата за облози. Меѓу казнетите е и претседателот на Трабзонспор, Ертугрул Доган, пренесува Би-би-си.
Професионалната фудбалска дисциплинска комисија ги разгледа случаите на вкупно 448 функционери, кои федерацијата во септември привремено ги суспендираше и против кои поведе дисциплинска постапка. Станува збор за луѓе кои во изминатите пет години работеле во клубовите од првите две турски лиги и за кои е утврдено дека ставале облози додека биле на функција.
Комисијата заклучи дека 147 од нив ги прекршиле правилата и им изрече забрана од 45 дена, во текот на кои не смеат да вршат никакви должности во фудбалот. За останатите 301 лице не беше пронајдена доволна основа за казна, пренесува Си-ен-ај.
Доган е казнет според членот 57/2 од турскиот Фудбалски дисциплински правилник, со примена на членот 13, се наведува во одлуката. Истата казна ја доби и претседателот на Ерзурумспор, Ахмет Дал, пренесува турскиот Ен-ти-ви. Без казна останаа, меѓу другите, неколку поранешни членови на управата на Бешикташ, функционери поврзани со Фенербахче и Галатасарај, како и сегашниот член на управата на Галатасарај, Емир Арал.
Казната за Доган е особено чувствителна за Трабзонспор, клубот кој летово го доведе Мохамед Салах. Според правилата, во текот на 45те дена Доган нема да смее да извршува никакви должности поврзани со фудбалот, што значи дека нема да може официјално да го претставува клубот.
Правилата на ТФФ, како и оние на ФИФА и УЕФА, им забрануваат на фудбалерите, тренерите, судиите и функционерите да ставаат облози. Турскиот фудбал е потресен од аферата со облози од минатата година, кога федерацијата суспендираше 149 судии и повеќе од илјада фудбалери, а на крајот на септември беше уапсен и шефот на судиите, Ферхат Гундогду.
