Притисокот врз Џани Инфантино пред изборите за претседател на ФИФА расте. Европската фудбалска унија (УЕФА) ѝ испрати на ФИФА писмо со 42 прашања за начинот на управување и одлуките на светската фудбалска централа и побара одговори и документи најдоцна до 2 ноември. Истовремено, Инфантино ја сели кампањата за нов мандат во Азија, каде што во среда во Токио ќе се сретне со претставниците на Азиската фудбалска конфедерација (АФК).
Писмото на осум страници во понеделникот го потпиша генералниот секретар на УЕФА, Теодор Теодоридис, и го испрати до својот колега во ФИФА, Матијас Графстрем. „Повлекувањето на проектот, признавањето на грешките и најавата за потенцијални реформи во управувањето не одговараат на прашањето како биле донесени одлуките ниту зошто Советот на ФИФА не бил вклучен во соодветната фаза“, се наведува во писмото, пренесува BBC Sport. „Овие прашања бараат одговори сега. Тие не можат да се одложат до следната седница на Советот на ФИФА.“
Најголем дел од прашањата се однесуваат на проектот „ФИФА форвард ентерпрајз“, план за продажба на дел од комерцијалните права на Светското првенство на приватни инвеститори, вреден 4,2 милијарди долари, од кој ФИФА подоцна се откажа. УЕФА бара објаснување зошто компанијата Трајв капитал на Џошуа Кушнер била избрана за главен инвеститор без тендер и зошто договорот за ексклузивност бил потпишан без консултација со Советот на ФИФА. Кушнер е брат на зетот на американскиот претседател Доналд Трамп, кој ја доби Наградата за мир на ФИФА, па УЕФА прашува и кој ја воспоставил наградата и кој одлучил таа да му се додели на Трамп.
Европската централа поставува прашања и за дополнителните исплати на Инфантино што не биле објавени во годишниот извештај на ФИФА, за случајот со американскиот напаѓач Фоларин Балогун на Светското првенство, како и за 27-минутната пауза во финалето на Мундијалот, наведува Sky Sports. УЕФА побара и аудиоснимка од седницата на Советот на ФИФА, на која Инфантино минатата недела се извини за грешките и побара прашањата да му бидат доставени писмено.
Портпаролот на ФИФА изјави дека светската централа има намера да одговори, но дека нема да ја наруши доверливоста со коментирање на интерната комуникација пред медиумите. УЕФА не наведе што ќе преземе ако ФИФА не го испочитува рокот. Претседателката на Англиската фудбалска асоцијација и потпретседателка на ФИФА, Деби Хјуит, претходно изјави дека ако Инфантино не одговори на прашањата, тогаш „не е соодветен да биде претседател на ФИФА“.
Рокот на УЕФА истекува две недели пред 18 ноември, крајниот рок до кој кандидатите треба да ја потврдат својата намера да се кандидираат против Инфантино на изборите во март 2027 година. Швајцарецот, кој ја води ФИФА од 2016 година, бара четврти мандат, а според пресметката на агенцијата АП, поддршка досега му изразиле 87 од 211 национални федерации. Најголемиот блок противници е во Европа.
Затоа средбата во Токио може да биде важна. Таа ќе се одржи во хотел со пет ѕвезди, речиси без присуство на медиуми. Претседателот на АФК, шеикот Салман бин Ибрахим Ал Калифа, на почетокот се спротивстави на планот на Инфантино, но според Атлетик, можеби ги приближил своите ставови до ставовите на првиот човек на ФИФА. Азиските федерации се поделени: Катар го поддржува Инфантино, додека Јордан јавно се противи.
Следната седница на Советот на ФИФА е закажана за 16 декември во Доха. Во меѓувреме, по откажувањето од продажбата на правата, Инфантино предложи средствата за развој на фудбалот да се зголемат за 3,4 милијарди долари, со што секоја членка во периодот од 2027 до 2030 година би добила по 25 милиони долари.
