Олександр Усик не размислува за крај на кариерата. Според списанието „Ринг“, поранешниот апсолутен светски шампион во тешка категорија има на ум уште две големи борби за 2027 година: трет дуел со Тајсон Фјури и можен меч со Дејвид Бенавидез.
Информацијата ја објави новинарот Мајк Копингер во емисијата „Инсајд д Ринг“, која беше емитувана во четвртокот. Усик претходно водеше разговори за борба со поранешниот шампион во тешка категорија Дионтеј Вајлдер, но таа комбинација засега не е реализирана.
Двете големи борби, сепак, зависат од исходот на претстојните мечеви на Фјури и Бенавидез. Фјури, кој има биланс од 36 победи, два пораза и едно реми, на 11 декември на стадионот „Принсипалити“ во Кардиф ќе се бори против Ентони Џошуа за „супер“ појасот на ВБА во тешка категорија.
Со досегашните две победи над Фјури, Усик се наметна како најдобар боксер во тешка категорија. Во мај 2024 година Украинецот го собори Британецот и со поделена одлука на судиите стана апсолутен шампион, а седум месеци подоцна го доби и реваншот со едногласна одлука.
Бенавидез, кој е непоразен со 32 победи, од кои 26 со нокаут, во моментов е прв на ранг-листата на „Ринг“ во крузер категорија и ги држи појасите на ВБА и ВБО. Се очекува во декември да се бори за обединување на титулите против Михал Чеслак, шампионот на ВБЦ.
Доколку Бенавидез го совлада Чеслак, следниот голем предизвик веројатно би бил шампионот на „Ринг“ во крузер категорија, Џај Опетаја, за време на викендот на Синко де Мајо следната година. Дури потоа би можела да дојде на ред борбата со Усик.
Усик има 39 години и е непоразен со 25 победи, од кои 16 со нокаут. Последен пат се бореше на 23 мај, кога во 11тата рунда го запре поранешниот шампион во кикбокс Рико Верховен. Еден месец подоцна се откажа од појасите на ИБФ, ВБА и ВБЦ во тешка категорија.
Официјална потврда за следниот противник на Усик засега нема. Деталите ги пренесе The Ring.
