По тринеделната пауза за репрезентативните натпревари, Првата македонска фудбалска лига денеска продолжува со 9тото коло. Во центарот на вниманието е гостувањето на шампионот Вардар кај Скопје на стадионот „Железарница“, а лидерот Шкендија од Тетово гостува кај Шкендија од Арачиново во Чаир.
Скопје со нов тренер против шампионот
Двата тима влегуваат во натпреварот со нови луѓе на клупата. Скопје за време на паузата го смени стручниот штаб и наместо Муарем Муарем, тимот сега го води Иван Варадиновски. Во таборот на Скопје се надеваат дека промената ќе донесе нов циклус со подобри резултати.
„Се подготвувавме добро во овој период на репрезентативна пауза, имаше и промени во клубот и се надеваме дека ќе почнеме една серија на подобри резултати. Ни гостува Вардар и мотивот кај нас е огромен да го покажеме квалитетот и да го запреме шампионот. Ќе дадеме сè од себе да го изненадиме фаворитот“, изјави фудбалерот на Скопје, Гроздановски.
Вардар не ја почна најдобро новата сезона, во која има амбиции за трофеи, но шампионот направи промени на клупата. Тренерот Миодраг Божовиќ за време на паузата имаше повеќе време да работи со тимот и да ги наметне своите идеи. Во „црвено-црниот“ табор јасно порачуваат дека одат по трите бода, но ќе треба да бидат многу пофокусирани отколку на некои претходни гостувања, како она во Куманово.
Натпреварот меѓу Скопје и Вардар почнува во 15 часот, а главен судија е Фуркан Идризи.
Дерби на двете Шкендии во Чаир
Уште порано, во 13 часот, лидерот на табелата, Шкендија од Тетово, гостува кај Шкендија од Арачиново на стадионот во Чаир. Капитенот на Тетовци, Арбин Зејнулаи, смета дека паузата дошла во идеален момент. „Не само што им даде простор на повредените играчи целосно да се опорават, туку ни овозможи и детално да ги анализираме сите пропусти. За нас задоволство носат само трите бода“, рече Зејнулаи.
Во таборот на Шкендија, левиот бек Бојан Димоски тренира со полн интензитет и е на располагање, додека Мевлан Мурати сè уште се опоравува од повреда и нема да игра. Домаќините од Арачиново, кои ја бараат првата победа против Тетовци во фудбалската елита, по трите порази во меѓусебните дуели во Купот на Македонија, се надеваат на поддршката од своите навивачи. „Го знаеме квалитетот на противникот и го почитуваме, но имаме голема верба во нашиот тим“, изјави Амир Нухија. Натпреварот го суди Јован Качевски.
