Првиот натпревар меѓу Сан Антонио и Оклахома по драматичниот седми натпревар од минатогодишното финале на Западната конференција покажа дека ривалството меѓу двата тима не стивнало. Тандер славеше со 116-104 во Сан Антонио, а вечерта ја обележаа кавгата во втората четвртина и најлошата шутерска партија на Виктор Вембањама во последните месеци.
Инцидентот се случи на 9:21 минути пред крајот на втората четвртина, кога Деарон Фокс го фати Чет Холмгрен одзади за рамениците и го фрли на паркетот. Според официјалниот извештај на судиите на НБА, по консултација со центарот за видеоповторувања, на Фокс му беше досуден флагрантен прекршок од прв степен. Технички прекршоци добија Вембањама од Спарс и тројцата Вилијамс од Оклахома: Џејлен, Џејлин и Кенрич, а исклучувања немаше.
Според ЕСПН, Џејлин Вилијамс прв дотрча на местото на инцидентот и застана лице в лице со Вембањама, кој се вмеша за да го заштити Фокс. „Ќе станам и ќе продолжам да играм, но ценам што соиграчите застанаа зад мене. Не сум сигурен како добивме три технички прекршоци за реакција на нешто друго. Но, ако тие сакаат да играат физички, ние мораме да одговориме“, изјави Холмгрен. Фокс, пак, имплицираше дека Холмгрен претерал при падот: „Не го фрлив толку силно, ви ветувам.“
Џејлен Вилијамс ја прими кавгата со хумор. „Не ми се допадна потегот и само влетав таму. Ова е прв пат во историјата Вилијамс, Вилијамс и Вилијамс да добијат технички прекршок. Среќен сум што сум дел од тоа“, рече крилото на Тандер.
Вембањама го заврши натпреварот со 12 поени, од кои дури десет од линијата за слободни фрлања, 13 скока, три асистенции и шест блокади, но од игра погоди само еден од 13 шута. Според извештајот на Асошиејтед прес, објавен на официјалната страница на НБА, Французинот ги промаши првите 12 обиди, меѓу кои и обид за закуцување по додавање во воздух, кој му го блокираше новајлијата Адај Мара, висок 221 сантиметар, а единствениот кош го постигна со алеуп по додавање на Фокс на крајот од третата четвртина. Тоа е неговиот најмал број погодоци од игра уште од 10 мај, кога против Минесота погоди два од пет шута.
Холмгрен, кој во седмиот натпревар од минатогодишната серија имаше само четири поени и четири скока, овојпат беше главниот чувар на Вембањама и заврши со 14 поени, седум скока и четири блокади. „Чет е талент за идеалната петорка на НБА на двата краја од теренот. Кога е свој, агресивен и самоуверен, тимот е подобар. Не е случајност што имавме добра вечер“, изјави Шеј Гилџес-Александер, кој постигна 32 поени. Џеред Мекејн додаде 20 поени со шест погодени тројки од осум обиди.
Секој технички прекршок во НБА носи и парична казна, која за првите пет изнесува по 2.000 долари, а 16тиот технички прекршок во сезоната носи автоматска суспензија од еден натпревар. Сан Антонио следниот натпревар го игра во петок во Остин, додека Оклахома во четврток го игра својот прв домашен натпревар во сезоната.
