Претседателот на Бугарската федерација за таеквондо и поранешен европратеник Слави Бинев е застрелан во саботата наутро во својот дом во софиската населба Павлово, потврди бугарското Министерство за внатрешни работи. Бинев имаше 60 години.
Вршителот на должноста главен секретар на МВР, Љубомир Николов, изјави дека пријавата за прострелано лице пристигнала на бројот 112 во 10:18 часот по локално време. „Малку подоцна утврдивме дека на адресата биле присутни три лица, познаници на простреланото лице“, рече Николов, пренесува БНТ.
Сведок изјавил дека слушнал пукање и видел три лица како бегаат со автомобил. Осомничените биле приведени на автопатот Тракија, кај тунелот Трајанови Врата, во насока кон Пловдив, а полицијата кај нив пронашла две оружја. Според бугарското МВР, приведените се занимаваат со градежништво.
Според извори на БНТ од истрагата, Бинев бил убиен за време на расправија со познаници околу пари. Николов подоцна изјави дека причината најверојатно се нерасчистени финансиски односи и дека, според досегашните докази, убиството не е нарачано, пренесува БТА. Директорот на Столичната дирекција за внатрешни работи, Николај Пелтеков, најави дека материјалите најверојатно ќе бидат доставени до обвинителството во недела.
Бинев е роден на 10 декември 1965 година во Софија. Пред да влезе во бизнисот и политиката, активно тренираше таеквондо, а во 1992 година стана европски првак на отвореното првенство во Целје, Словенија. Подоцна беше меѓународен судија, тренер и спортски функционер.
Од 2017 година беше претседател на Бугарската федерација за таеквондо, а во мај оваа година беше реизбран на функцијата за нов петгодишен мандат. Беше и прв потпретседател на Европската таеквондо унија, пишува Софија Глоуб.
Во политиката влезе преку партијата Атака, од чија листа во 2007 година стана член на Европскиот парламент, а во 2009 година беше реизбран. Во 2014 година беше избран за пратеник во бугарското Народно собрание и ја предводеше парламентарната комисија за култура и медиуми, но во декември истата година се повлече од функцијата по протестите на културните работници.
Бугарските медиуми го опишуваат како контроверзна личност чие име уште од почетокот на деведесеттите години се поврзуваше со ноќниот живот во Софија. Истрагата за убиството продолжува, а осомничените се префрлени во Софија, пренесува Новинајт.
