Македонското првенство ќе има тројца претставници во репрезентацијата на Словенија на почетокот на квалификациите за Европското првенство во 2028 година. Селекторот Урош Зорман на списокот од 23 ракометари за ноемвриските натпревари против Босна и Херцеговина и Израел ги вклучи средниот бек на Вардар, Јака Малус, како и двајцата играчи на Алкалоид, бекот Нејц Цехте и пивотот Матиц Сухолежник.
Списокот беше претставен во вторникот во Љубљана, на прес-конференција одржана кај новиот спонзор на Ракометната федерација на Словенија. Словенците ги почнуваат квалификациите на 4 ноември од 18 часот во Копер против Босна и Херцеговина, а три дена подоцна, од 17:30 часот, во Целје го пречекуваат Израел, пренесува словенечкиот портал 24ur, повикувајќи се на агенцијата СТА. Двата натпревари ќе се играат на словенечки терен, бидејќи федерациите на Словенија и Израел се договориле да го заменат домаќинството во првиот меѓусебен дуел.
„При изборот на кандидатите секогаш има предизвици, и на овој список има играчи за секаков вкус, ако малку се пошегувам. Списокот за првиот квалификациски циклус беше особено тешко да се состави, бидејќи повеќето играчи се здрави“, изјави Зорман. Тој не можеше да смета на Блаж Благотиншек, кој веќе подолго време се мачи со полесна повреда, ниту на Клемен Ферлин, кој, според селекторот, е начнат и веќе малку во години, па овојпат доби слободно.
Покрај тројцата ракометари од македонското првенство, во составот се и главните носители на играта: капитенот Блаж Јанц, Домен Макуц, Алекс Влах и Борут Мачковшек. Ново лице е 18-годишниот Аљуш Анжич од Целје, кој првпат е повикан за официјална репрезентативна акција во рамките на квалификациите.
Зорман одговори и на критиките дека во репрезентацијата првенствено повикува играчи од својот клуб Слован. „Не сум таков каков што мнозина мислат или ми префрлаат, дека им ветувам на играчите од странство дека ако дојдат во Слован ќе бидат и во репрезентацијата. Кај мене играчите не се стари или млади, од Слован или од Целје, туку добри и лоши, односно во подобра или во полоша форма“, рече селекторот, пренесува Ekipa.
Словенија е во петтата квалификациска група, заедно со Чешка, Босна и Херцеговина и Израел. „Ја имаме улогата на фаворити на хартија, не само за првите два натпревари во Копер и Целје, туку и во целата група. Нашата цел на почетокот на новата репрезентативна сезона е да освоиме четири бода, а потоа ќе се фокусираме на Светското првенство во јануари“, додаде Зорман. Словенија во јануари 2027 година ќе настапи на Светското првенство во Германија.
Европското првенство во 2028 година ќе се игра од 13 до 30 јануари во Португалија, Шпанија и Швајцарија. Според пропозициите на ЕХФ, пласман на завршниот турнир обезбедуваат првите две репрезентации од секоја од осумте групи и четирите најдобри третопласирани репрезентации, а директно учество веќе имаат трите домаќини и шампионот Данска.
Македонија ги игра квалификациите во осмата група, заедно со Шведска, Грција и Луксембург. Првите две кола се на програмата од 4 до 8 ноември, а квалификациите продолжуваат во март и мај 2027 година.
