Александар Зверев се пласираше во четвртфиналето на Мастерсот во Шангај, првпат од 2019 година. Првиот носител во вторникот го совлада Александар Бублик со 7-6(6), 4-6, 7-6(1) по два часа и 41 минута борба, пренесува официјалната страница на Rolex Shanghai Masters.
Германецот во првиот сет спаси четири сет-топки, во вториот имаше проблеми со десниот глужд, а во одлучувачкиот тај-брејк беше немилосрден. Натпреварот го заврши со еден од своите 14 асови, откако во третиот сет успеа да надомести и брејк заостанување. Со оваа победа го намали заостатокот во меѓусебните дуели со Бублик на 2-3.
„Глуждот за жал ми правеше проблеми. Тоа е донекаде разбирливо бидејќи играм многу тенис, што е и добар знак затоа што играм добро. Сè повеќе го чувствувам телото, но среќен сум што поминав. Беше тежок натпревар, тој игра неверојатен тенис“, изјави Зверев.
Ова му е 40ти пласман во четвртфинале на турнир од серијата Мастерс 1000. Зверев ја брка осмата титула на ова ниво и првата во Шангај. Натпреварот со Бублик му беше прв откако во понеделникот го обезбеди првото место на ранг-листата на крајот од годината. Германецот ќе стане 30тиот тенисер што ќе стигне до првото место, а најрано тоа може да се случи на 2 ноември.
Де Минор е следниот противник
Во четвртфиналето Зверев ќе игра против Алекс де Минор, кој со 6-3, 6-4 за еден час и 25 минути го совлада Карен Хачанов. Австралиецот минатата недела играше во финалето во Пекинг, а во Шангај сè уште нема загубено сет. Ова му е десетти пласман во четвртфинале на турнир од серијата Мастерс 1000, а во моментов е деветти во трката за завршниот турнир во Торино.
Жеа ја продолжува сензационалната недела
Французинот Артур Жеа (21) го елиминира 13тиот носител Јакуб Меншик со 7-6(4), 6-4 за еден час и 37 минути, на својот прв турнир од серијата Мастерс 1000. Во тај-брејкот во првиот сет се врати од 0-3 и освои седум од последните осум поени, а го надигра Чехот и на сервис, со 11 асови наспроти шест, пренесува Rolex Shanghai Masters.
„Многу сум среќен со резултатот. Денес имав мал реванш, бидејќи на УС Опен застанав во ова коло. Сакав да одам далеку оваа недела и сега почнува да изгледа добро. Се надевам дека ќе продолжи“, рече Жеа, кој претходно го елиминира и Бен Шелтон. Тој од јули има 13 победи во 15 натпревари, а од понеделник ќе дебитира меѓу најдобрите 50 тенисери во светот.
Негов следен противник е Алехандро Давидович Фокина, кој со 1-6, 6-3, 7-6(6) го совлада шампионот од 2023 година, Хуберт Хуркач, и му ја прекина серијата од девет победи во Шангај. Шпанецот втор натпревар по ред славеше во тај-брејк во третиот сет, а ја искористи третата меч-топка. Против Хуркач сега води со 6-2 во меѓусебните дуели, со четири последователни победи.
Во среда се играат преостанатите осминафинални дуели, меѓу кои се и натпреварите Медведев против Циципас, Руд против Оже-Алијасим, Јодар против Ван де Зандсхулп и Пол против Бергс.
