Ракометарите на Охрид по ремито во првиот натпревар, во реванш натпреварот кој исто така се одигра во „Билјанини Извори“ славеа над Волендам со 24:23.
Со оваа голема победа охридскиот клуб си обезбеди уште два натпревари во второто по ранг натпреварување во Европа и тоа против силниот тим на Порто.
Натпреварот започна слично како и првиот, со предност од 3:0 за охриѓани по само пет минути игра. Во 11 минута избраниците на Андоновски имаа и плус четири (5:1), но потоа Волендам се врати во игра и намали на 6:5. Сепак популарните „Гладијатори“ понесени од атмосферата во салата повторно ја вратија предноста од четири погодоци (8:12) на само три минути до одморот.
На полувреме се замина со резултат 13:10 во корист на охридскиот тим.
Во вториот дел Охрид продолжи со добрата игра и на 20 минути до крајот на натпреварот стигнаа до највисоки плус пет, 12:17.
Во 50. минута гостите од Холандија комплетно се вратија во натпреварот. Откако Блажески не реализира удар од седум метри, Волендам во следниот напад го израмни резултатот на 20:20.
Потоа се до крајот се играше гол за гол, а салата буквално „еруптираше“ во последните моменти од натпреварот кога Блажески погоди за 24:22 и беше јасно дека Волендам нема да стигне до посакуваните два погодоци.
Бобан Блажески со шест гола беше најефикасен во редовите на Охрид, а исто толку постигна Мршулја во спротивниот табор.
Охриѓани првиот натпревар со Порто во второто квалификациско коло од ЕХФ Купот ќе го играат на 7-8 октомври, додека реванш натпреварот е закажан за една недела подоцна.
