Македонскиот автомобилист Стефан Тренески ја заврши својата прва целосна сезона во шампионатот Формула 4 Централна Европа (F4 CEZ). Последниот натпреварувачки викенд се одржа на патеката Хунгароринг кај Будимпешта, на која се вози и Големата награда на Унгарија во Формула 1.
Според информациите од неговиот тим, Тренески е првиот Македонец кој настапил во натпреварувања од формула категориите под покровителство на Меѓународната автомобилистичка федерација (ФИА).
Четврто време на тренинзите, казна во трката
На Хунгароринг, македонскиот возач го постигна четвртото најдобро време на тренинзите во конкуренција од 38 натпреварувачи, а во квалификациите го освои седмото место. Во трката се бореше за повисок пласман, но доби казна од десет секунди поради контакт со друг болид при рестартот, па официјално беше класифициран на 11тото место. Од тимот оценуваат дека казната била престрога, бидејќи станувало збор за минимално преклопување на предното крило со болидот на друг натпреварувач.
Ниту последната трка од сезоната не заврши според очекувањата. Тренески уште на стартот имал контакт со друг возач, при што му бил оштетен пневматикот, па не успеал да стигне до посакуваниот пласман и до бодови.
Од академијата до целосна сезона
Тренески во 2025 година ја освои академијата F4 CEZ, а кон крајот на истата година дебитираше со тимот Janík Motorsport. Во сезоната 2026 настапуваше за чешкиот тим JMT Racing Engineering, со болид Tatuus F4 T-421 со стартен број 427. Во текот на годината возеше на патеките Ред Бул Ринг, Словакија Ринг, Мост, Брно и Хунгароринг.
И покрај несреќниот завршеток, од тимот ја оценуваат сезоната како значаен чекор во неговата кариера и во претставувањето на Македонија во меѓународниот автомобилизам. Според нив, за Тренески веќе постои интерес од други тимови во шампионатот за сезоната 2027. Разговорите се во тек, а повеќе детали ќе бидат соопштени во наредниот период.
Формула 4 е една од почетните категории во системот на трки со едноседни болиди, преку која младите возачи стекнуваат искуство пред преминот во повисоките категории.
