Реал Мадрид вечерва од 18:45 часот гостува кај АЕК во Атина во четвртото коло од Лигата на шампионите, а тренерот Жозе Мурињо предупреди дека неговиот тим мора да одигра сериозно за да ги освои трите бода.
„Блиску сме до пласман во плеј-офот, но далеку од директен пласман во осминафиналето и ни требаат бодови. Мора да одиграме сериозен натпревар против тим кој е силен, особено на својот стадион. Реал, ако не грешам, има само една победа во осум европски натпревари во Атина. Мислам дека тоа зборува многу“, изјави Мурињо на прес-конференцијата.
Португалецот на почетокот изрази сочувство за смртта на Хесус де Мигел, фудбалерот на Тенерифе. „Тоа е многу шокантно за светот, а замислете за фудбалскиот свет и за луѓето како нас кои секој ден се на терен. Тешко е и тажно. Сите мои зборови и чувства се за семејството и пријателите на играчот. Мислам дека е многу тежок момент и за другиот играч вклучен во ситуацијата“, рече Мурињо.
За пресвртот во Рим, тој смета дека има само емотивно влијание. „Емотивно тоа има влијание, но во однос на самата игра, не мислам така. Повеќе верувам во процесот. Не верувам многу во преломни моменти“, рече тренерот на Реал.
Мурињо не сакаше да зборува за можната трета титула во Лигата на шампионите со трет различен клуб. „Тоа би била третата со три различни клубови, и оваа со најголемиот клуб на светот. Но, тоа се хипотетички ситуации, а јас претпочитам реални. Реалноста е дека сè уште ни требаат бодови“, рече Мурињо, кој потсети дека Реал досега освоил девет бода.
Тренерот потврди дека Винисиус ќе игра. „Тој игра. Имаме многу квалитетни играчи на таа позиција“, рече Мурињо, споменувајќи ги Браим и Ендрик. За Арда Гилер беше краток. „Тој не игра. Прашајте ме за него во сабота“, изјави Португалецот, пренесува официјалната страница на Реал Мадрид.
Мурињо зборуваше и за капитенот Федерико Валверде, кој игра како бек. Тој рече дека тимот бил составен со Валверде како играч од средниот ред, но дека е задоволен од неговите настапи на бековската позиција и дека Уругваецот повремено ќе игра и во средниот ред.
На прес-конференцијата учествуваше и Едуардо Камавинга, кој исто така изрази сочувство за де Мигел и рече дека победата во Атина е важна за да се потврди довербата во тимот, објавува Ртве.
