Бен Шелтон го совлада сонародникот Томи Пол со 6-4, 4-6, 6-3 во четвртфиналето на Ролекс Париз Мастерсот и се пласира во полуфиналето. Американскиот леворак тенисер забележа 19 аса и го заврши мечот за еден час и 46 минути, пишува АТП.
Шелтон веќе обезбеди пласман на АТП Финалето во Торино, а со оваа победа истовремено му ја затвори вратата на Пол за настап во Торино и му го обезбеди пласманот на Френсис Тијафо, кој е осми во трката.
„Френсис имаше извонредна година. Тој е еден од моите најдобри пријатели и да го видам како влегува во Торино за првпат е неверојатно“, рече Шелтон по натпреварот. Третиот Американец во трката, Тејлор Фриц, сè уште може да го освои последното место ако го совлада Карлос Алкарас во вечерната сесија.
Шелтон рече дека првиот сет бил дуел на сервиси, додека во вториот Пол извршил притисок откако рано направил брејк. Во третиот сет третиот носител одигра офанзивен тенис и сигурно го отсервира мечот до победа.
Ова е прво полуфинале на Шелтон на Мастерс 1000 надвор од неговите два триумфа во Канада. Тој е првиот Американец во полуфиналето во Париз од 2017 година, кога Џек Сок и Џон Изнер стигнаа до таа фаза.
Во полуфиналето Шелтон го очекува победникот од дуелот меѓу домашниот фаворит Лука Ван Аше и квалификантот Ринки Хиџиката. Овој натпревар е продолжение на силната есенска серија на 24-годишниот леворак тенисер пред завршницата на сезоната.
Париз Мастерсот е последната станица пред АТП Финалето. Со оваа победа Шелтон ја потврди добрата форма и го задржа американското присуство во горниот дел од жребот во главниот град на Франција.
