Женската тениска асоцијација (ВТА) презеде целосна одговорност откако при пренос во живо од тренинг на ВТА завршницата се слушнаа коментарите на Џесика Пегула за Мира Андреева. Американката преку микрофон ја нарече Русинката „дива“ и рече дека треба да биде понижена, пренесува Гардијан.
Разговорот меѓу Пегула и нејзиниот тренер Марк Ноулз беше емитуван на стримот на ВТА на Јутјуб од Индијан Велс. Пегула ја критикуваше и тренерката на Андреева, Кончита Мартинес, затоа што не реагирала на однесувањето на својата играчка.
Портпарол на ВТА изјави: „ВТА ја презема целосна одговорност што не ги информираше играчите и нивните тимови дека микрофоните, поставени за стрим на тренинзите, биле вклучени. Искрено се извинуваме што не ја исполнивме одговорноста да ги известиме играчите и тренерите.“
Тренинзи без звук
Асоцијацијата потврди дека стримовите од тренинзите ќе продолжат, но без звук. Целта била да се снима амбиенталниот звук од теренот, но не биле воведени соодветни заштитни мерки.
ВТА завршницата почнува во недела. Пегула и Андреева се во различни групи и можат да се сретнат најрано во полуфиналето.
Случајот следува по претходните критики на Коко Гауф и Ига Швјонтек во врска со приватноста на играчите кога камерите влегуваат во простории што тие ги сметаат за приватни.
