Манчестер Јунајтед и Астон Вила одиграа 4-4 во спектакуларен натпревар на „Олд Трафорд“, во кој домаќините двапати заостануваа со два гола разлика. Последните два гола за тимот на Мајкл Карик беа постигнати во надополнетото време.
Вила силно го почна натпреварот. Алисон уште во првата минута го совлада голманот Сене Ламенс, а во 4тата минута Ламенс не успеа да го задржи неговиот удар, па Николас Џексон зголеми на 2-0. Ова е првпат во историјата на Премиерлигата Јунајтед да заостанува со два гола уште во првите четири минути.
Домаќините се вратија во игра до полувремето. Бруно Фернандеш во 16тата минута беше сигурен од белата точка, откако Бубакар Камара го фаулираше Матеус Куња, а во 44тата минута Јури Тилеманс изедначи против својот поранешен клуб, пишува Скај спортс.
Второто полувреме повторно почна лошо за Јунајтед. Диого Дало го собори Алисон, а Џон Мекгин во 48мата минута реализираше пенал за 2-3. Во 53тата минута Лени Јоро ја насочи топката кон сопствениот гол, Ламенс ја одби во стативата, а Леон Горецка одблизу погоди за 2-4.
Кога изгледаше дека сè е готово, двајцата резервисти го променија текот на натпреварот. Џошуа Зирки во 92рата минута ја намали предноста, а во 96тата минута голманот на Вила, Зајон Сузуки, промаши при корнерот на Фернандеш, по што Патрик Дорго со глава погоди за конечни 4-4.
Натпреварот се одигра точно 40 години откако Алекс Фергусон ја презеде клупата на Јунајтед, потсети Гардијан.
И покрај освоениот бод, Јунајтед ќе ја помине репрезентативната пауза во зоната на испаѓање, со само осум бода по десет кола. Тимот на Карик нема победа во Премиерлигата од август.
Вила со освоениот бод се искачи во горната половина на табелата, но тренерот Унаи Емери не го криеше незадоволството поради тоа што неговиот тим ја испушти победата во финишот.
