Ламине Јамал нема да игра за Шпанија против Чешка во четврток во Прага, во Лигата на нациите, поради болки во десното колено. Шпанската федерација соопшти дека се очекува тој да биде подготвен за натпреварот со Англија во недела, пренесува ЕФЕ.
Крилото на Барселона почувствувал болки по победата над Атлетико Мадрид со 2-1 во неделата, на натпреварот на кој ги одигра сите 90 минути. Тој се вратил во Барселона, каде што бил подложен на прегледи, по што било одлучено да остане таму и да продолжи со опоравувањето.
Натпреварот во Прага ќе го пропушти и капитенот на Реал Сосиедад, Микел Ојарзабал, кој е во завршна фаза од грип и ќе се опоравува во Сан Себастијан. Медицинскиот штаб на федерацијата е во постојан контакт со лекарите на двата клуба.
Според федерацијата, двајцата треба да се приклучат на екипата на Луис де ла Фуенте во наредните денови за да бидат на располагање за дуелот со Англија на стадионот Метрополитано во Мадрид, пишува Ел Мундо.
Селекторот го повика на списокот и Виктор Муњос, крилото на Ливерпул. Претходно Шпанија остана и без Андер Баренечеа, кој се повреди на натпреварот на Реал Сосиедад со Рајо Ваљекано, а на негово место е повикан Хорхе де Фрутос.
Чешка е последна во групата без освоен бод по четири кола, а Шпанија ја победи со 3-1 на првиот натпревар во Овиедо. Се очекува дуелот со Англија во недела во 20:45 часот да одлучи за првото место во групата.
Јамал во понеделникот беше избран и во идеалниот тим на ФИФПРО за 2026 година, заедно со соиграчот од Барселона, Пау Кубарси.
