Претседателот на Евролигата, Дејан Бодирога, положи заклетва како пратеник во Народното собрание на Србија, на конститутивната седница на 15тиот парламентарен состав, пренесува Еврохупс.
Поранешниот кошаркар влезе во Собранието откако студентската изборна листа победи на парламентарните избори во Србија, пред блокот предводен од српскиот претседател Александар Вучиќ.
Бодирога стана еден од најпознатите поддржувачи на студентското движење, кое се засили по смртоносното уривање на настрешницата на железничката станица во Нови Сад во 2024 година.
Бодирога беше кандидат на студентската листа и беше многу активен во кампањата, настапувајќи на повеќе собири пред изборите, пишува Баскетњуз. Неговата политичка кариера започна неодамна, заедно со антикорупциските протести што следеа по трагедијата во Нови Сад.
Неговиот профил веќе е објавен на официјалната страница на Народното собрание на Србија, меѓу пратениците во новиот состав.
Бодирога останува и претседател на Евролигата, функција што ја извршува од 2022 година, кога го наследи Жорди Бертомеу. Тој ќе продолжи да ја извршува оваа функција паралелно со новите пратенички обврски, наведува Еврохупс.
Како играч, Бодирога е една од најголемите легенди на европската кошарка и често се споменува како еден од најдобрите кошаркари што никогаш не заиграле во НБА. Освојуваше трофеи со Реал Мадрид, Панатинаикос и Барселона, а трипати ја освои Евролигата.
Со репрезентацијата на Југославија стана светски и европски првак, а сега, по завршувањето на играчката кариера и преземањето на функцијата во Евролигата, ќе учествува и во донесувањето важни одлуки во Србија.
















