Поранешниот член на Тотенхем, Паулињо потврди дека Барселона сака да го донесе во своите редови.
Паулињо кој сега игра во Кина за тимот на Гвангжу за „Глобо Еспорте“ изјави: „Имаше контакти со моите претставници и имаше и понуда. Многу сум среќен со мојот живот и кариерата во овој момент, па тешко е за мене да одлучам.“
Иако сите очекуваа трансферот во Кина да биде чекор назад за него истиот се покажа како полн погодок. Паулињо е редовен и во репрезентацијата на Бразил каде што исто така прикажува одлични изданија.
Играчот од средниот ред вели дека е среќен што Барселона се интересира за него но и дека треба да се поклопат многу работи за трансферот да се реализира.
„Мора да разгледам многу работи пред да ја донесам одлуката, пред се тука е мојата жена, плус го сакам животот во Кина.
Среќен сум што тим како Барселона се интересира за мене, тоа е нешто непроценливо. Немам рок до кога да им одговорам, зборувам со мојот агент секој ден, но исто така и Барселона и мојот тим треба да постигнат договор.“- заврши Паулињо.
Покрај Гвангжу, 28 годишниот фудбалер во својата кариера има настапувано Вилниус, Лоџ, Пао де Акуар, Брагантино, Коринтијанс и Тотенхем.
